पूर्व प्रधानमन्त्री एवम् एमाले नेता झलनाथ खनाल अस्वस्थ भई नर्भिक अस्पतालमा भर्ना भएका छन् । उनलाई अक्सिजनको सपोर्टमा राखिएको छ ।

नेता खनाललाई विगत ९ दिनदेखि ज्वरो आइरहेको थियो । ज्वरो कम नभएसँगै स्वास्थ्यमा थकान महसूस हुने, सास फेर्न गाह्रो हुनेजस्ता समस्या पनि देखिएपछि सोमवार बिहान उनलाई नर्भिक अस्पतालको आकस्मिक कक्षमा भर्ना गरिएको थियो ।

उनलाई हाल आकस्मिक कक्षबाट वार्डमा सारिएको छ । वार्डमा अक्सिजनको सपोर्टमा राखेर उपचार जारी रहेको नर्भिक अस्पतालले जनाएको छ । खनालको रगतमा  हेमोग्लोबिनको पनि कमी देखिएको छ । 

उपचारमा संलग्न चिकित्सकका अनुसार उनलाई कोरोनापछिको समस्या हुनसक्ने अनुमान गरिएको छ । नेता खनाललाई यसअघि कोरोनासंक्रमण देखिएपछि नर्भिक अस्पताल भर्ना गरी उपचार गरिएको थियो ।