कोरोना संक्रमण नियन्त्रणका लागि सरकारले निशेधाज्ञा जारी गरेपछि सबैभन्दा दैनिक ज्याला मजदुरी गरेर जिविका चलाउने वर्ग समस्यामा परेको छ । जसले दिनमा कमाएपछि राति उसको चुल्हो बल्थ्यो । 

सरकारले कोरोनालाई हेरेर निशेधाज्ञा त जारी गर्यो तर, त्यस्तो गरी खाने वर्गसम्म सरकारको ध्यान पुग्न सकेन । सरकारको ध्यान खाली हुने खानेतिर मात्रै केन्द्रिय हुँदा ज्याला मजदुरी गरेर गुजारा गर्ने मुसहर, चमार, दुसाध, खप्वे, डोम, हल्खोरलगायतका समुदाय समस्यामा परे । 

एक छाक खान पनि उनीहरुलाई हम्मे– हम्मे परिरहेको छ। यहि समस्यालाई ध्यानमा राखेर राष्ट्रिय एकता अभियानले त्यस्ता समुदायलाई लक्षित गरी एकछाक राहत वितरण कार्यक्रम सञ्चालन गरेको छ ।

यो कार्यक्रमले एक छाक खान समस्या हुनेका लागि धेरै नै राहत भएको अभियानकी उपाध्यक्ष सुनिता साहले बताइन् । अभियान मार्फत दुई केजी चामल र सो अनुसार दाल, आलु र नुन दिने गरिएको साहको भनाई छ ।

अभियानका अध्यक्ष विनय यादवले एकछाक राहत वितरण अभियानको अर्थ नै समस्या परेकालाई मात्र समेट्ने रहेको बताए । उनले कार्यक्रम दाताहरुको सहयोगमा चलाएको बताए । 

उनका अनुसार अहिलेसम्म यो कार्यक्रम सप्तरी, सिरहा, धनुषा, महोत्तरी, सर्लाहीसम्म पुगेको छ । विस्तारै तराई मधेशका अन्य जिल्लामा पनि लैजाने सोच बनाएको यादवले जानकारी दिए।

राहत राष्ट्रिय एकता अभियान एक छाक खाना