धनुषामा प्रहरीले एक बालकलाई चोरीको आरोपमा पक्राउ गरेर हिरासतमा निर्घात कुटपिट गरेको छ। 

धनुषाको शहिदनगर नगरपालिका–४ ननुपट्टी बस्ने १५ वर्षीय रविशंकर कुमार पण्डितलाई प्रहरीले हिरासतमा कुटपिट गरेको हो । कुटपिटबाट घाइते भएका बालकको प्रादेशिक अस्पताल जनकपुरमा उपचार भईरहेको छ।

उनलाई अचेत अवस्थामा शनिबार साँझ अस्पताल पुर्याईएको थियो ।

रविशंकर दैनिक दुध पुर्याउन जाने गरेको मनिष गुप्ताको घरमा चोरी भएको विषयमा प्रहरीले उनलाई लिएर गएको थियो । प्रहरी कार्यालयमा पुर्याएपछि पाइपले कुटेको उनका काका बिन्देश्वर पण्डितले जानकारी दिए।

बालकका दुवै पैताला, हातको औंला, खुट्टाको औला सुन्निएको र खुट्टाको तिघ्रामा पाइपको निलडाम बसेको छ। 

शहिदनगर–३ यदुकूहा स्थित इलाका प्रहरी कार्यालयको छेवैमा रहेको गुप्ताको घरमा गत शुक्रबार राति चोरी भएको थियो । सिसिटिभी फुटेजका आधारमा वालकसँग सोधपुछ गरिए पनि कसैले कुटपिट नगरेको प्रहरीले जनाएको छ ।