फुटको अन्तिम कसरत गर्दै गरेका नेकपा एमालेका अध्यक्ष केपी शर्मा ओली र वरिष्ठ नेता माधवकुमार नेपाललाई एक ठाउँमा ल्याउन राष्ट्रपति विद्यादेवी भण्डारी सक्रिय भएकी छन् ।

गत साता चिनियाँ राष्ट्रपति सि चिनफिङसँगको टेलीफोनपछि पार्टीलाई एक वनाउन भण्डारीको सकृयता वढेको हो । चिनियाँ राष्ट्रपतिसँगको छलफल सकिए लगत्तै प्रधानमन्त्री केपी शर्मा ओलीलाई शीतल निवास बोलाएकी थिइन् । त्यसयता उनले दोस्रो तहका नेताहरूमार्फत पार्टी एकतामा जोड दिइरहेकी छन् ।

माधवकुमार नेपाल समूहले २०७५ जेठ २ मा अध्यक्ष ओली फर्के पनि पार्टी एक हुन नसक्ने अवस्थामा पुगेको बताइरहँदा शीतल निवास फरक ढंगले लागेको हो । यद्यपि उनको पहलमा अध्यक्ष ओली गलत नभएको स्पष्टोक्ति हुने गरेकाले त्यो पहलले सार्थकता नपाउने देखिएको छ ।  

चिनियाँ राष्ट्रपति सीले खोप उपलब्ध गराउने सँगै नेपालको राजनीतिक अवस्थाबारेमा चासो राखेका थिए । राजनीतिक कुराकानीलाई भने अझै औपचारिक रूपमा बाहिर ल्याइएको छैन ।

यद्यपि अदालतको निर्णय आएपछि त्यो विषयमा सोच्न सकिने धारणा केही नेताहरूले व्यक्त गरेका छन् । विभिन्न कोण र तप्काबाट एमाले एकताको प्रयास भइरहेको छ । हुनत, वरिष्ठ नेता नेपालले ओलीविरुद्धको हस्ताक्षर फिर्ता नलिने बताएकाले पनि पार्टी एक हुने सम्भावना तत्काललाई टरेको छ ।

ओलीले नै नेपाललगायत नेतालाई पार्टीबाट निष्कासनसमेत गरिसकेका छन् । अध्यक्ष ओलीले आफूविरुद्धको हस्ताक्षर फिर्ता लिन भनिरहेका छन् भने नेपालले ओलीलाई संसद् विघटनको निर्णय फिर्ता लिएर २०७५ जेठ २ मा फर्कन भनिरहेका छन् ।

दुवैतर्फका दूतहरू मिलाउन सक्रिय छन् । सत्ताको रापमा परेका केही भने मिलेमा आफ्नो जागिर धरापमा पर्ने डरले ओलीभन्दा चर्को स्वरमा ओलीको गुणगानमा लागेको आरोप पनि नेपाल समूहको छ । 
 
सर्वोच्चमा पुगिसकेको विषयलाई लिएर बहस नगर्न र सर्वोच्चको निर्णय पर्खनसमेत आग्रह गरेका छन् । नेपाल समूहले तत्काल ओलीविरुद्धको हस्ताक्षर फिर्ता लिने कुनै पनि सम्भावना नरहेको बताएको छ । उनीहरूले ओलीले नेपाली जनतासँग माफी मागेर पार्टीको धुमिल छवि सुधार गर्नु पर्नेमा जोड दिइरहेका छन् ।

ओलीले प्रतिनिधि सभा विघटनको निर्णय गलत भएको भन्दै जनतासँग माफी मागेर फिर्ता गरेमात्र पार्टी एकता हुनसक्ने सन्देश नेपाल समूहले राष्ट्रपति भण्डारीसमक्ष राखेको छ । 

पार्टी मिलाउन सक्रिय भएर लागेकाले नेपाल समूहले राष्ट्रपतिलाई त्यस्तो जवाफ दिएको हो । पार्टीबाट निकाल्ने अनि वार्ताको ढोंग गर्ने भन्दै त्यस्तो वार्ताको औचित्य नभएकोसमेत उनी निकट नेताहरू बताउँछन् । 

एमाले एकता गर्न बनेको कार्यदलका सदस्य तथा नेपाल निकट प्रमुख ११ नेतालाई नै कारबाही गरेपछि वार्ताको ढोंग किन आवश्यक रह्यो भन्दै नेपालले वार्ता आवश्यक नभएको बताएका छन् । ओलीले नेपालसहित नेतालाई गत १० गते साधारण सदस्यसमेत नरहने गरि निकालेका थिए । 

यद्यपि कतिपय विषय अहिले अदालतमा रहेकाले पनि त्यो टुंगोमा नपुगेसम्म वार्ताहरू चलिरहने र प्रयास हुने बताए । नेपाल निकट नेता घनश्याम भुसालले निराश हुने अवस्था अझै नभएको बताए ।