नेकपा एमालेको विहिवार वस्ने भनिएको स्थायी कमिटी बैठक फेरि स्थगित भएको छ । वैठक अपरान्ह ४ बजेका लागि बोलाइएको थिए ।

एमाले केन्द्रीय कार्यालयका सचिव शेरबहादुर तामाङका अनुसार बैठक अर्को सूचना जारी नभएसम्मका लागि स्थगित भएको हो।

यसअघि बुधबार बस्ने भनिएको बैठक अन्तिम समयमा आएर स्थगित भएको थियो ।

संस्थापन पक्षका एक नेताका अनुसार माधवकुमार नेपाल पक्षको केन्द्रीय समिति बैठक बसिरहेको र त्यहाँ हुने छलफलका आधारमा स्थायी कमिटी बैठक बस्ने छ ।

संस्थापन पक्षले वरिष्ठ नेता झलनाथ खनाल–माधवकुमार नेपालसहित ११ नेतालाई साधारण सदस्यसमेत नरहने गरी निष्कासन गरेपछि एमालेको आन्तरिक विवाद विभाजनउन्मुख बनेको छ । त्यसपछि नेपालले आफूलाई ओलीविरुद्ध विपक्षी गठबन्धनमा उभाएका छन् ।

२ जेठमा फर्कने वा फागुन २३ पछिका निर्णय कार्यान्वयन गरेर जाने भन्नेमा एमालेमा विवाद छ । एकतालाई बचाइराख्न केही दिन यता दोस्रो तहका नेताहरुको संवादमा जुटेका छन् । पछिल्ला अनौपचारिक छलफलमा प्रधानमन्त्री एवं पार्टी अध्यक्ष केपी शर्मा ओली जेठ २ फर्कन सकरात्मक बनेको बताइएको छ ।