प्रतिबन्धित निलो बट्टा भएको क्याफिनयुक्त पेय पदार्थ रेडबुल बिक्रि वितरण गरेको आरोपमा महानगरिय अपराध महाशाखा काठमाडौले चारजनालाई पक्राउ गरेको छ । पक्राउ पर्नेमा काठमाण्डौको बबरमहल बस्ने प्रणव स्टोर न्यूरोडका सञ्चालक रबिनराज श्रेष्ठ, बाँके कोहलपुर घरभई हाल गंगबु बस्ने राजु पौडेल, निलो पुल बस्ने शक्तिमाता स्टोर कपनका सञ्चालक धन बहादुर श्रेष्ठ र ओसारपसारमा संलग्न बिरेन्द्र चौधरी पक्राउ परेकाछन् । 

सरकारले क्याफिनयुक्त  निलो बट्टा भएको  रेडबुल बिक्रि वितरण बन्द गरेको छ । सोमबार महानगरीय अपराध महाशाखाबाट खटिएको बिशेष टोलीले काठमाडौंको न्यूरोड, सिनामंगल, पूरानो बानेश्वर, कपन, गोठाटार लगायतका स्थानबाट प्रतिबन्धित निलो कलरको शक्तिबर्धक पेय पदार्थ निलो रेडबुल बिक्रीबितरण गरिरहेको अवस्थामा फेला पारी ४ जना व्यक्तिहरुबाट २०२ कार्टुन रेडबुल बरामद गरेकोछ ।  बरामद सामाग्री मध्ये ८४ कार्टुन रेडबुल  बा २१ च १२५ नम्बरको टाटा पिकअप भ्यानमा ओसारपसारका लागि लोड गरेको अवस्थामा नयाँवस्ती गोठाटारबाट बरामद गरिएको हो । 

बरामद समानहरु खुला सीमानाको फाइदा उठाउदैं भारतसंग सीमानाका जोडिएका तराईका बिभिन्न जिल्लाहरुबाट लुकाइछिपाई नेपाल भित्र्याउने र पिक अप भ्यान तथा रात्रीकालीन बसका बिभिन्न भागमा लुकाई काठमाण्डौसम्म ओसारपसार गरि बजारमा बिक्रि बितरण गर्ने गरेको भन्ने प्रारम्भिक अनुसन्धानबाट खुलेको अपराध महाशाखाले जनाएको छ । पक्राउ परेका व्यक्तिहरुलाई बरामद सामान सहित आवश्यक कार्वाहीको लागि भन्सार बिभाग पठाईने उल्लेख गरिएको छ ।

महानगरिय प्रहरी अपराध महाशाखा