नेपालले रेल सञ्चालनका लागि आफुसँग गरेको सम्झौता कार्यान्वयनमा समस्या देखिएको भन्दै भारतीय कम्पनी कोंकण रेलवे कर्पोरेसन लिमिटेडले सम्झौता तोड्ने संकेत देखाएको छ ।

नेपाल रेलवे कम्पनीका महाप्रबन्धकसहित सरोकारवाला निकायलाई कोंकणले वुधवार पठाएको पत्रमा कुर्था–जयनगर रेल सञ्चालनमा ढिलाइ भएको र सम्झौता कार्यान्वयनमा पनि चासो नदेखाएको जनाउँदै सम्झौताबाट बाहिरिने संकेत दिएको हो ।

सम्झौता अनुसार नेपालले वार्षिक ३५ करोड रुपैयाँ दिने र त्यसमध्ये अग्रिम रुपमा २० प्रतिशत रकम वुझाउनु पर्ने उल्लेख छ। यसैगरी आवश्यकमध्ये २६ जनशक्ति नेपाललाई कम्पनीबाट बेहोर्ने उल्लेख छ । मे २१, २०२१ मा नेपाल रेलवे कम्पनी र भारतीय रेल्वे कम्पनीबीच सम्झौता भएको पाँच महिना वितिसक्दा पनि अग्रिम रुपमा दिनुपर्ने २० प्रतिशत रकम भुक्तानी नदिएको जनाईएको छ ।

तर कम्पनीले सम्झौता बमोजिम भुक्तानी पठाउने तयारी गर्दा कम्पनीका महाप्रबन्धकलाई स्पष्टीकरण सोधेकाले भुक्तानी गर्न नसकिएको बुधबारमात्र राजीनामा दिएका महाप्रबन्धक गुरु भट्टराईले बताएका थिए । 

यसैगरी,  नेपालमा रेल सञ्चालनको लागि अनिश्चितता देखिएको र लामो समय हुँदा पनि सञ्चालनमा लागि प्रकृया अगाडि बढ्न नसकेको बताउँदै पत्रमा रेल सञ्चालनको लागि गरिएको सम्झौताअनुसार अबका दिनमा सोही दरमा रेल सञ्चालन गर्न नसकिने पत्रमा उल्लेख गरेको छ । भारतीय रेल्वे कम्पनीले नेपालमा ल्याउने विज्ञलाई पनि लामो समय भूमिकाविहीन बनाएर राख्न नसकिने बताएको छ ।

कम्पनीले जनवरी १९ मा रेलको डेमो सञ्चालनको लागि प्रस्ताव गरेको थियो । नेपाली कम्पनीले व्यावसायिक मर्मतको लागि प्रस्ताव गरेको थियो । नेपाल रेल्वे र विभाग मिलेर भारतको रेल्व कम्पनीलाई कम रेटमा रेल सञ्चालन गर्ने सुझाउँदै सम्झौता गर्न दबाब दिएको र कम दरमा सम्झौता भएको जनाएको छ ।
 
नेपालले रेल सञ्चालनका लागि १० महिना अघि करिब ८५ करोड खर्चेर दुई थान रेलको डब्बा खरिद गरेको थियो तर प्रकृयागत ढिलाइका कारण अझै सञ्चालनमा आएको छैन ।

सम्झौता कोंकण रेलवे कर्पोरेसन लिमिटेड