प्रतिनिधिसभाको शुक्रबारको बैठकमा सभामुख अग्निप्रसाद सापकोटाले प्रतिनिधि सभाको बिहीबारको बैठकमा बोलिएको ‘मेन्टल्ली’, ‘फिजिकल्ली’ डिसअर्डर भन्ने शब्दलाई संसद सचिवालयको रेकर्डबाट हटाउन निर्देशन दिएका छन् ।

प्रतिनिधि सभाको शुक्रबारको बैठक सुरु हुने बित्तिकै प्रमुख प्रतिपक्षी दल नेकपा (एमाले)का प्रमुख सचेतक विशाल भट्टराईले हिजोको बैठकमा सत्तापक्षीय एक जना सांसदले अर्को प्रतिपक्षी दलका सांसदलाई अमर्यादित र असंसदीय शब्द बालेको भन्दै त्यसलाई संसदको रेकर्डबाट हटाउन माग गरेका थिए ।

हिजोको बैठकमा विशेष समयमा बोल्दै नेकपा(माओवादी केन्द्र)का सांसद मातृकाप्रसाद यादवले पूर्व प्रधानमन्त्री केपी शर्मा ओली ‘मेन्टल्ली र फिजिकल्ली’ अस्वस्थ भएकाले नै मुलुकलाई दुर्घटना तर्फ उन्मुख गराएको आरोप लगाएका थिए ।

नेकपा माओवादी केन्द्रका सांसद मातृका यादवले ‘मेन्टल्ली डिसअर्डर’ भन्दै पुर्वप्रधानमन्त्री एवम् नेकपा एमालेका अध्यक्ष केपी शर्मा ओलीलाई प्रतिनिधिसभाको वैठकमै अपमानित गरेका थिए ।

बिहीबार प्रतिनिधिसभाको बैठकको विशेष समयमा सांसद यादवले ओली ‘मेन्टल्ली र फिजिकल्ली ठिक नभएको’ वताएका हुन ।

पुर्वमन्त्री समेत रहेका यादवले ओली मानसिक तथा शारीरिक रूपमा ठिक नभएको बताउँदै आफूखुसी काम गर्न रोक लगाएपछि वर्तमान सरकारलाई परमादेशको सरकार भनी टिप्पणी गरेको वताए ।

‘मैले एउटै पार्टी हुँदा स्थायी समितिको बैठकमा नै भनेको थिएँ । कमरेडहरू उहाँ मेन्टल्ली पनि ठिक हुनुहुन्न । फिजिकल्ली पनि ठिक हुनुहुन्न । त्यसैले कुनै बेला पनि दुर्घटना हुनसक्छ । यो जिम्मेवारी किन बोकाउनुहुन्छ ?’ उनले भनेका छन्–‘उहाँलाई अन्याय किन गर्नुहुन्छ ? म एमालेका माननीय मित्रहरूलाई के भन्न चाहन्छु भने जहाज उडाउने क्याप्टेनहरूको मेडिकल चेक हुन्छ । देशकै जहाज उडाउन दिएपछि दुर्घटना हुँदैन ? पार्टीकै जहाज उडाउन दियो भने दुर्घटना हुँदैन ?’

यादवले परमादेशबाट संसद् ब्युँताएको भनेर लाग्ने सबैलाई राजीनामा गर्न र चुनाव जितेर आउन पनि भनेका थिए । 

‘यो हाउसमा हामी परमादेशबाट होइन जनादेशबाट आएका हौ । जनादेशकै आधारमा संविधान बनेको हो । संविधानले दिएको अधिकार उचित र अनुचित ढंगले प्रयोग गर्ने कुरामा विवाद भएको हो’ उनले भने–‘पूर्व प्रधानमन्त्री माननीय केपी शर्मा ओली जीलाई म के आग्रह गर्न चाहन्छु भने यो हाउसमा नआई राजीनामा दिए हुन्छ । चुनाव लडेर आए भईगो नि त । परमादेशबाट आएको छ भन्ने जो जोलाई लागेको छ राजीनामा दिए हुन्छ । परमादेश भन्ने अनि जनादेशको अपमान गर्ने ?’

शुक्रबार नै  नेकपा एमालेका सांसद विशाल भट्टराईले ओलीलाई ‘मेन्टल्ली डिसअर्डर’ भनेको विषयमा आपत्ति जनाएका थिए । मर्यादित र सम्मानित सदनमा अमर्यादित र संसद्लाई नसुहाउने अभिव्यक्तिहरू आफूहरूका लागि गम्भीर आपत्तीजनक भएको भन्दै रेकर्डबाट हटाउन सभामुखको ध्यानाकर्षण गराएका थिए । 

‘मेन्टल्ली डिसअर्डर भएकोजस्ता अभिव्यक्तिहरू पटकपटक दोहोर्याएर भन्नुभयो । म प्रश्न गर्न चाहन्छु । त्यो भन्ने अधिकार उहाँलाई कहाँबाट छ ? उहाँसँग के प्रमाण छ ? के तथ्यका आधारमा उहाँले यो भन्दैै हुनुहुन्छ ? यो महत्वपुर्ण निकायमा अमर्यादित खालका र संसद्लाई नसुहाउने अभिव्यक्तिहरू हाम्रा लागि गम्भीर आपत्तीजनक छ’ उनले भने–‘यो रेकर्डबाट हटाईयोस् । अन्यथा नेकपा एमाले यो कुरालाई कुनै हालतमा पनि सहँदैन भन्ने कुरा सभामुखमार्फत् जानकारी गराउन चाहन्छु।’

मेन्टल्ली डिसअर्डर