अफगानिस्तानको राजधानी काबुललाई विद्रोही समूह तालिबानले कब्जामा लिए पछि त्यहाँका नागरिक विस्थापित हुन थालेका छन् । काबुल छोड्ने क्रममा अमेरिकी सेनाले गोली चलाउँदा त्यहाँ भागदौड समेत मच्चिएको थियो ।

देश छोड्नेहरुका कारण काबुलमा रहेको अन्तर्राष्ट्रिय विमानस्थलमा भीड लागेको छ । विमानस्थलमा गोलाबारीसमेत भएको आवाज सुनिएको र केही घाइते भएका बीबीसीले जनाएको छ ।

तालिबानले भने काबुलका बासिन्दालाई नडराउन आग्रह गरेको छ । आफूहरुले बदला नलिने भन्दै नडराउन तालिबानले आग्रह गरेको हो । तालिबानका प्रवक्ताले आफ्ना लडाकुलाई नागरिकको रक्षा गर्न निर्देशन दिएका छन् ।

अफगानिस्तानका नागरिकको अवस्था अब के होला भन्ने चासोकाबीच तालिबानका प्रवक्ता सुहैल शाहीनले आफ्ना लडाकुलाई नागरिकलाई दु;ख नदिन र उनीहरुको रक्षा  गर्न आदेश दिएका हुन् । उनले अनुमति नलिइ नागरिकको घरमा प्रवेश नगर्न पनि भनेका छन् । यस्तै उनले नागरिकको सम्पत्ति र सामानमा नोक्सानी नगर्न पनि भनेका छन् ।

अफगानिस्तानको राजधानी काबुल प्रवेश गरेसँगै तालिबानले आफूलाई नागरिकप्रति उदार रुपमा प्रस्तुत गर्ने प्रयास गरेको छ । यसअघि तालिबानले आफूले महिलाको अधिकार कुण्ठित नगर्ने र उनीहरुको सम्मान गर्ने पनि बताएको थियो ।

तर, यसबीचमा महिलाहरुलाई बुर्खा लगाउन बाध्य पारेको तथा कुटपिट गरेको खबर भने आइरहेका थिए । 

यसैबीच, अमेरिकाले काबुलका बासिन्दाको उद्धार गर्न एक हजार अतिरिक्त सुरक्षाकर्मी परिचालन गर्ने भएको छ ।

यसअघि अमेरिकाले त्यहाँ तीन हजार सैनिक पठाएको थियो । अफगानिस्तानमा २० वर्षसम्म रहेका अमेरिकी सेना स्वदेश फर्किन थालेसँगै त्यहाँ विद्रोही समूह तालिबान सक्रिय भएको हो ।