संघीय परिषद अध्यक्ष वावुराम भट्टराईले सांसद नै नभएकी पत्नि हिसिला यमीलाई मन्त्री वनाउन दवाव दिएपछि सत्तारुढ दल जनता समाजवादी पार्टी (जसपा)मा विवाद सुरु भएको छ । विशेष गरी भट्टराई र पार्टी अध्यक्ष उपेन्द्र यादवका विचमा विवाद उत्कर्षमा पुगेको जनाईएको छ ।

गठवन्धनमा रहेका नेताहरुले यसअघि नै सांसद नभएका व्यक्तिलाई मन्त्री नबनाउने सैद्धान्तिक सहमति गरेका थिए । तर, डा. भट्टराईले जसरी भए पनि आफ्नो समूहबाट हिसिला यमी वा गंगानारायण श्रेष्ठमध्ये एक जनालाई मन्त्री बनाउनु पर्ने अडान लिएका छन् । भट्टराईको यस्तो जिद्धिका कारण अध्यक्ष उपेन्द्र यादव अफ्ठ्यारोमा परेका श्रोतले जनाएको छ ।

नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चा सम्मिलित गठबन्धनका नेताहरुको विचमा भएको सहमति अनुसार कांग्रेस सभापति एवम् प्रधानमन्त्री शेरबहादुर देउवाले मन्त्रीको नाम सिफारिस गर्दा सांसदलाई मात्र सिफारिस गर्न र सांसद नभएकालाई अन्य नियुक्तिमा मिलाउन भनेका छन् ।

तर, भट्टराईले जसरी भएपनि गर्नुपर्छ भन्दै गैरसांसदलाई मन्त्री बनाउन दबाब दिएको जनाइन्छ । डा.भट्टराई नेतृत्वको नयाँ शक्ति र यादव नेतृत्वको मधेशी जनाधिकार फोरम गरी दुई धार रहेको जसपामा भट्टराई बाहेक अन्य कोही पनि सांसद छैनन् । आफु प्रधानमन्त्री भइसकेकाले मन्त्री बन्न नमिल्ने भएपछि उनले उपेन्द्र यादवलाई समेत सरकारमा जान नदिन वहाना वनाई रहेको यादव पक्षको वुझाई छ । 

गत भदौ एक र दुई गतेको बैठकमा पनि भट्टराईले उपेन्द्र यादवले सरकारमा जान नहुने अभिब्यक्ति दिएका थिए । यो सरकार चुनावी सरकार भएकाले अध्यक्ष नै सरकारमा गएपछि पार्टी सञ्चालनमा समस्या उत्पन्न हुने उनले तर्क गरेका थिए ।

उनले हिसिला मन्त्री वनाउन र अध्यक्ष यादवलाई रोकेर अन्य नेतालाई नेतृत्व गरेर सरकारमा पठाउने अनेक वहाना वनाईरहेको नेताहरु वताउँछन् । त्यसका लागि हिसिला यमीले गंगानारायण श्रेष्ठ, महेन्द्र राययादव र राजेन्द्र श्रेष्ठलाई उकासिरहेको उनीहरुको भनाई छ। ‘तपाइहरू पनि उपप्रधानमन्त्री बन्न सक्नुहुन्छ’ भन्दै उनीहरुलाई उकासेर उपेन्द्र यादवलाई दवावमा राख्न भट्टराईले यमीलाई परिचालन गरेको श्रोतको दावी छ ।

वावुराम भट्टराई हिसिला यमी जसपा गैरसांसदलाई मन्त्री