यस्तो हुने भयो माधव नेपाल नेतृत्वको प्रस्तावित पार्टीको संरचना
प्रस्तावित नेकपा (एकीकृत समाजवादी) पार्टीले १७ पदाधिकारीसहित १५१ सदस्यीय केन्द्रीय कमिटी बनाउने भएको छ ।
चन्द्रगिरीमा सुरु भएको केन्द्रीय कमिटी बैठकमा प्रस्तुत विधानअनुसार अध्यक्ष, वरिष्ठ नेता १, सात उपाध्यक्ष, महासचिव, दुई उपमहासचिव, ७ सचिव गरी १७ पदाधिकारी हुनेछन् । उनीहरुसहित ११५ पूर्ण र ३६ जना वैकल्पिक केन्द्रीय सदस्य हुनेछन् ।
महाधिवेशन नहुँदासम्म केन्द्रीय कमिटीका पदाधिकारी राष्ट्रिय परिषदबाट निर्वाचित गर्ने व्यवस्था विधानमा गरिएको छ ।
पार्टीमा ८ वटा केन्द्रीय निकायको प्रस्ताव गरिएको छ । जसमा राष्ट्रिय महाधिवेशन, राष्ट्रिय परिषद, केन्द्रीय कमिटी, केन्द्रीय अनुशासन आयोग, केन्द्रीय लेखा परीक्षण आयोग, केन्द्रीय निर्वाचन आयोग, केन्द्रीय सल्लाहकार परिषद् र केन्द्रीय ज्येष्ठ कम्युनिष्ट मञ्च रहने छन् ।
केन्द्रीय अनुसाशन आयोग, केन्द्रीय निर्वाचन आयोग, केन्द्रीय लेखा परीक्षण आयोग सबै ३१ सदस्यीय हुने प्रावधान विधानमा समेटिएको छ ।
प्रत्येक पाँच वर्षमा महाधिवेशन गर्ने, दुई महाधिवेशनबीचको पार्टीको सर्वोच्च नीति निर्माता संस्थाको रुपमा महाधिवेशनले राष्ट्रिय परिषद् निर्वाचित गर्ने व्यवस्था पनि गरिएको छ ।
पार्टीको प्रदेश निकायहरूमा प्रदेश÷विशेष अधिवेशन, प्रदेश÷विशेष परिषद्, प्रदेश÷उपत्यका विशेष प्रदेश÷सम्पर्क समन्वय कमिटी र प्रदेश आयोगहरूको प्रस्ताव गरिएको छ ।
प्रदेश कमिटीमा अध्यक्ष–१, उपाध्यक्ष–२, सचिव–१ उपसचिव–२ र सदस्यहरू रहेको प्रदेश कमिटी रहने व्यवस्था गर्न लागिएको छ । प्रदेश कमिटीको कुल सदस्य संख्या प्रदेशमा जति प्रदेशसभा सदस्य निर्वाचित छन् त्यति र थप १५ जना रहने व्यवस्था प्रस्ताव गरिएको छ ।
उपत्यका विशेष प्रदेश कमिटी ७१ सदस्यीय प्रस्ताव गरिएको छ ।
नेकपा (एकीकृत समाजवादी)ले मार्गदर्शक सिद्धान्त मार्क्सवाद–लेनिनवादलाई बनाएको छ । पार्टीको संगठनात्मक सिद्धान्त जनवादी केन्द्रीयताको लेनिनवादी सिद्धान्तलाई मान्ने भएको छ ।
पार्टीको अन्तरिक विधान, नियमावली र घोषणापत्र टुंगो लगाउन पार्टीका नेताहरू चन्द्रागिरिस्थित चन्द्रागिरि हिल्स रिसोर्टमा बैठक बसिरहेका छन् ।
