प्रस्तावित नेपाल कम्युनिष्ट पार्टी (एकीकृत समाजवादी) का केन्द्रीय सदस्य विरोध खतिवडाले तत्काल केपी शर्मा ओलीसँग आत्मसमर्पण गर्न गएका नेतापनि केहि समयपछि नै माधव नेपालसँगै फर्किने वताएका छन् ।

एमाले अध्यक्ष केपी शर्मा ओलीका कटु आलोचक रहेका खतिवडाले तेस्रो धार निर्माण गरेर बसेका पदाधिकारी र स्थायी कमिटी सदस्यहरु पार्टी एकढिक्का बनाउने प्रयत्नमा रहेको र नयाँ पार्टी दर्ता प्रक्रियामा छुटेको वताए । ‘केपी ओलीलाई सच्याउन सकिन्छ कि भनेर उहाँहरु लाग्नु भएको हो । तर, ओलीजस्ता धुन्धुकारी सच्चिन्छन् भन्नेमा मलाई चाहिँ विश्वास छैन’ उनले भने–‘उहाँहरुलाई विश्वास लागेको होला । तर, मलाई चै छैन ।’

ओलीले उनीहरुको ‘खिल’ को संज्ञा दिएको खतिवडाले स्मरण गरे । ‘उहाँहरुलाई पनि ओलीले भनिसक्नुभयो नी ‘पिलो त निचोरियो, खिलहरु बाँकी नै रह्यो’ उनले थपे–‘हेर्न बाँकी छ उहाँहरु खिल भएर ओलीसँग बस्नु सक्नुहोला ? मलाई त विश्वास लाग्दैन । नयाँ पार्टी दर्ता हुने पेरिफेरिमा उहाँहरु हामीसँगै आउनुहुन्छ ।’

जति प्रयत्न गरेपनि उनीहरुको ओलीतिर जाने त बाटै बन्द भएको भन्दै आफुहरुतिर नआएर केही मान्छेहरु सामान्य नागरिक भएर बस्न सक्ने सम्भावना उनले देखाए । ‘जस्तो कि, घनश्याम भुसाल किताब लेखेर बसिदिनुभयो वा रघुजी पन्तहरु लेख लेखेर बस्न सक्लान् । तर, उहाँहरु पनि ओलीतिर त टिक्न सक्नुहुन्न’– खतिवडाले भने ।

ओलीले माधव नेपाल र उनको टिमलाई मात्र होईन आफनै टिमका नेताहरुलाई समेत धोका दिने र झुठो वोल्ने गरेको खतिवडाको भनाई छ। ‘तत्कालीन कार्यदलका सदस्यको रुपमा सुवास र विष्णुहरुले माधव कमरेडलाई भेटिरहनु भएको थियो । त्यसबेला सुवास र विष्णु कमरेडले एउटा गज्जबको खबर ल्याउनुभयो । अब पार्टी एकता हुने र १० बुँदे पूर्ण कार्यान्वयन हुने । त्यसका लागि बराबर हैसियतको दुई अध्यक्ष मानेर माधव कमरेडलाई अध्यक्ष बनाउन ओली तयार भएको खबर थियो त्यो’ उनले भने–‘माधव कमरेडले त्यो कुरा मान्नु भएन । उहाँले जवाफ दिनुभएको थियो म पदको लोभी होइन, अध्यक्ष चाहिँदैन, वरिष्ठ नेता नै ठीक छु । त्यसरी अध्यक्ष नै बनाउने हो भने युवराज ज्ञवाली वा अष्टलक्ष्मीलाई बनाउनुस् । त्यसरी समान हैसियत र हस्ताक्षर चल्ने गरी पार्टी मिल्छ भने हुन्छ भन्नुभयो ।’

सुवास नेम्वाङ र विष्णु पौडेलले ‘त्यसो नभन्नुस्, तपाईले नाइँ नभन्नुस् । अष्ट र युवराजहरुले हुँदैन । तपाईं चुप लागेर यो कुरा मानिदिनुस्, तपाई हामीहरु सबैको अभिभावक हुनुहुन्छ । बाँकी कुरा हामी मिलाउँला । यसमा इग्नोर गर्ने काम नगर्नु्स्’ भनेपछि माधव नेपाल मौन वसेको उनले जानकारी दिए । माधव नेपाललाई मनाएर उनीहरु ओलीलाई त्यो कुरा सुनाउँदा जाँदा ‘त्यसरी कहाँ हुन्छ ? त्यो मिल्दैन । त्यो पुरानो कुरा हो । तीन दिनअघिको कुरा हो त्यो’ भन्दै टक्टकिएको उनले सुनाए ।

‘ओलीको त्यो कुराले सुवास र विष्णु कालो निलो हुनुप¥यो । हो यस्तै तरिकाका कारण ओलीप्रति हामीहरुको मात्रै होइन, उहाँकै मान्छेहरुको पनि विश्वास घट्दै गएको छ’–उनले भने।

खतिवडाले अस्टलक्ष्मी शाक्यको प्रशंगमा पनि अन्य नेताकै कुरा लागु हुने वताए । ‘नयाँ पार्टी नबनिसकेको सन्दर्भमा उहाँ केपी र माधव नेपालकै सल्लाहमा मुख्यमन्त्री बन्नुभएको हो । यसमा केपी ओलीको छलकपटपूर्ण स्वार्थ र माधव नेपालको बाध्यता देखिन्छ’ उनले भने–‘१ महिना प्रतिक्षा गरौं थाहा भइहाल्छ । उहाँ ओलीतर्फ लाग्नुभएको र प्रतिगमनको मतियार बन्न खोज्नुभएको हो भने उहाँलाई हटाइन्छ । माधव नेपालको पनि केपी ओलीको पनि साझा हुँ भनेर धेरै समय टिक्न सकिन्नँ । तर, उहाँ पनि केपी ओलीले भनेको खिलअन्तर्गत पर्नुहुन्छ ।’

विरोध खतिवडा नेकपा (एकीकृत समाजवादी)