महालक्ष्मी बैंकमा धितो राखेको सुन फिर्ता माग्दा नक्कली सुन दिएपछि
महालक्ष्मी विकास बैंक कुमारीपाटी शाखामा एक ऋणीले ऋण चुक्ता गरेर धितो राखेको आफ्नो सुन फिर्ता माग्दा नक्कली भएको खुलेको छ । बैंकले गरेको अनियमितता प्रकरणमा तीन जना तत्कालीन शाखा प्रबन्धक पक्राउ परेका छन् ।
ललितपुर महानगरपालिका वडा नम्बर ११ चाकुपाटकी विष्णु महर्जनले २०७२ फागुनमा महालक्ष्मी विकास बैंकबाट २५ तोला सुन धितो राखेर १४ लाख बढी रुपैयाँ ऋण लिएकी थिइन् ।
करिब ६ वर्षअघि बैंकमा धितो राखेको सुन भदौ १० गते फिर्ता माग्दा बैंक म्यानेजरले उक्त सुन ६ महिनाअघि नक्कली देखिएको भन्दै महर्जनलाई जानकारी दिएका थिए । तर महर्जनले भने सुन धितो प्रक्रियाको बेला नै बैंकले परिक्षण गरेको बताएकी छन् । बैंकले नक्कली सुन दिएको भन्दै महर्जन अहिले मिडियासँग र प्रहरीसँग न्यायको लागि अपिल गरिरहेकी छन् ।
