काबुल । कतारमा तालिबानको राजनीतिक कार्यालयका उपप्रमुख अब्दुल सलाम हनाफीले काबुलमा अफगानिस्तानका लागि चिनियाँ राजदूत वाङ यूसँग भेट गरेको तालिबानी प्रवक्ताले जानकारी दिएका छन् ।

उनीहरूले चिनियाँ दूतावास र कूटनीतिज्ञको सुरक्षा, अफगानिस्तानको वर्तमान स्थिति, द्विपक्षीय सम्बन्ध र चीनको मानवीय सहायताबारे छलफल गरेको रुसी सञ्चारमाध्यम स्पुतनिकले प्रवक्ता मोहम्मद नईमको ट्वीटलाई उद्धृत गर्दै जनाएको छ । 

एक हप्ताभन्दा पहिले अफगानिस्तानको राजधानी तालिबानले नियन्त्रणमा लिएपछि चीनले काबुलमा रहेको दूतावास खुला राखेको छ र विदेशी नागरिक र उनीहरुका अफगान सहयोगीहरुलाई तुरुन्त निकासी गर्न आग्रह गरेको छ ।

यदि आतंकवादी समूहले काबुलमा लोकतान्त्रिक रूपमा निर्वाचित सरकारलाई पराजित गर्न सफल भयो भने तालिबानलाई अफगानिस्तानको वैध शासक मान्न चीन तयार रहेको बताइएको थियो । 

तालिबानले मे मा आफ्नो आक्रमण सुरू गरे र प्रमुख जिल्लाहरु कब्जा गर्न थालेपछि चीनले उक्त अभिव्यक्ति दिएको थियो । तालिबानले अगस्त १५ मा युद्धग्रस्त देशमा नियन्त्रण कायम गर्दै सत्ता कब्जा गरेको घोषणा गरेको थियो । 

अफगानिस्तानमा २० बर्षको उपस्थितिपछि भर्खरै अमेरिकी सेना फिर्ताले तालिबानको लागि अफगानिस्तानको विशाल भागमा कब्जा गर्ने बाटो प्रशस्त भएको हो । यसअघि जुलाई २८ मा पनि तालिबानी समूहले चिनियाँ विदेशमन्त्रीसहितका अधिकारीहरुलाई भेट गरेका थिए । 

चिनियाँ विदेशमन्त्रीसँग भेटेको १८ दिनपछि तािलबानी समूहले अफगानिस्तानमा कब्जा गरेको हो । चीन र तालिबानको बढ्दो सम्बन्धको बावजुद, बेइजिङले पूर्वी तुर्कस्तान इस्लामिक आन्दोलनलाई रोक्न सघाउ हुने अपेक्षा गरेको छ । 

चीनले गत महिना तालिबान प्रतिनिधिमण्डललाई बताएको थियो कि ईटीआईएमले आफ्नो राष्ट्रिय सुरक्षा र क्षेत्रीय अखण्डतालाई प्रत्यक्ष खतरा बनाएको छ र ईटीआईएम विरुद्ध लड्नु अन्तर्राष्ट्रिय समुदायको साझा जिम्मेवारी हो ।