जनप्रतिनिधि प्रतिको आक्रोशः पेट्रोल छर्केर वडा कार्यालयमा आगजनी
सुर्खेतको वीरेन्द्रनगर नगरपालिका–१ का वडाध्यक्ष गंगाराम सुनारको कार्यकक्षमा बुधबार विहान आगजनी गरिएको छ । वडा कार्यालयमा पेट्रोल छर्केर आगजनी गरिएको हो ।
आगजनीबाट कार्यालयका कुर्सी, सोफा, दराज र त्यहाँ रहेका सबै कागजातहरु जलेर नष्ट भएका छन् । बुधार बिहान ८ बजे नै एक कार्यक्रममा सहभागी हुन आफू राजधानी आएको समयमा आगजनी भएको वडाध्यक्ष गंगाराम सुनारले वताए ।
कार्यालयमा आगजनी गर्ने स्थानीय वास्ताम लामिछाने रहेको प्रहरीले जनाएको छ । उनले वडाध्यक्ष कार्यालयमा नभएको भन्दै विवाद गरेका थिए । वडा कार्यालयकै ल्याण्डलाइनबाट फोन आएको र कार्यकक्षमा आउनु पर्दैन भन्दै ती युवकले वडाध्यक्षलाई थर्काएका थिए । ‘डुलिडुली खाने ?’ भन्दै थर्काएको सुनारले वताए ।
उनले ‘तपाईं आउनुहुन्छ कि तपाईंको कार्यालय जलाई दिम ?’ भनेर पनि धम्की दिएको उनको भनाई छ। ‘त्यसको १० मिनेटपछि वडा कार्यालयमा आगजनी भएको खबर आयो । तिनै व्यक्तिले कार्यकक्षमा पसेर पेट्रोल छर्केर आगो लगाई दिएछन्’ उनले भने।
प्रहरीले लामिछानेलाई अहिलेसम्म नियन्त्रणमा लिन सकेको छैन ।
