नेकपा एमालेका अध्यक्ष केपी शर्मा ओलीले शेरवहादुर देउवा नेतृत्वको सरकारले जारी गरेको राजनीतिक दल विभाजनसम्बन्धी अध्यादेश प्रतिपक्षी दल फुटाउने दूःषित मनसायबाट अभिप्रेरित भएको पुष्टी भएको जनाएका छन् ।

मंगलबार बिहान कानुन, संसदीय तथा न्याय मामिला मन्त्री ज्ञानेन्द्रबहादुर कार्कीसँगको भेटमा अध्यक्ष ओलीले उक्त अध्यादेश सरकारले असंवैधानिक, षड्यन्त्रपूर्ण र बद्नितपूर्ण तरिकारले जारी गरेको पुष्टि भएको बताएका हुन् ।

सरकारले उक्त अध्यादेश सोमवारै खारेज गरेको छ। राष्ट्रपति विद्यादेवी भण्डारीले ‘राजनीतिक दलसम्बन्धी (दोस्रो संशोधन) अध्यादेश, २०७८’ खारेज गरेकी हुन । मन्त्रिपरिषद्को सोमवारको बैठकले सो अध्यादेश खारेज गर्ने निर्णय गरेको थियो ।

ओलीको सचिवालयले जारी गरेको प्रेस विज्ञप्तिमा पनि ओलीले कानुनमन्त्री कार्कीमार्फत प्रधानमन्त्रीलाई पठाएको सन्देशमा मध्यरातमा संसद् बन्द गरेर बिहानै अध्यादेश ल्याउने काम प्रमुख प्रतिपक्षी दलको विरुद्धको षड्यन्त्र भएको बताइएको छ ।

संसद् अधिवेशन चलिरहेका बेला कानुन निर्माण, परिवर्तन वा खारेजीजस्ता कुरा संसद्बाहेक अन्यत्रबाट हुन नसक्ने पनि ओलीले जनाएका छन् । संसद् अधिवेशन चालु रहेकै बेला संसद्मा प्रस्तुत विधेयकको वास्ता नगरी, संसद्को मानमर्दन गर्दै जारी गरिएको अध्यादेश खारेजीको सूचना असंवैधानिक, गैरकानुनी र दूःषित मनसायबाट अभिप्रेरित, दलीयव्यवस्था र प्रमुखप्रतिपक्षी दलविरुद्ध लक्षित छ भन्ने कुरा प्रस्ट भएको विज्ञप्तिमा उल्लेख छ।

सरकारले भदौ २ गते जारी गरेको राजनीतिक दल विभाजनसम्बन्धी अध्यादेश मार्फत एमाले फुटेको छ। वरिष्ठ नेता माधवकुमार नेपालले १९ सांसदसहित नेकपा एकिकृत समाजवादी दर्ता गरेका छन् ।

केपी शर्मा ओली राजनीतिक दल विभाजनसम्बन्धी अध्यादेश