औषधीले काम गर्न छोडेपछि शताब्दी पुरुष सत्यमोहन जोशीको स्वास्थ्य अवस्था गम्भीर बनेको छ। उनको ललितपुरको इमाडोलस्थित किस्ट मेडिकल कलेज तथा शिक्षण अस्पतालमा उपचार भईरहेको छ।

अहिले जोशीलाई प्रतिमिनेट ५ लिटर हाइफ्लो अक्सिजन दिएर विशेषज्ञ चिकित्सकको विशेष निगरानीमा राखिएको छ। किस्ट मेडिकल कलेजले जोशीको सम्पूर्ण उपचार निःशुल्क गर्दै आएको छ ।

जोशीको छातीमा निमोनिया संक्रमण देखिएको र उमेर धेरै भएका कारण रोगले ग्रसित पारेपछि औषधिले काम नगरेको चिकित्सकहरुले बताएका छन्। अचानक ब्लड प्रेसर घट्ने समस्या देखिएको र स्वास्थ्यमा सुधार नभएको उनीहरुले बताए।

निमोनिया र मुटुरोगसँगै डेंगु संक्रमण देखिएपछि उनलाई २२ दिनदेखि अस्पतालमा राखखिएको छ। स्वास्थ्य अवस्था केही सुधार भएपछि बुधबार उनलाई आईसीयूबाट क्याबिनमा सारिएको थियो । बिहीबार बिहान फेरि स्वास्थ्यमा समस्या देखिएपछि क्याबिनबाट आईसीयूमा सारिएको थियो ।