लजको कोठाभित्र गोप्य रूपमा भिडिओ बनाएको आरोपमा प्रहरीले एक जनालाई पक्राउ गरको छ । पकाउ पर्नेमा काठमाडाैं चन्द्रागिरी नगरपालिका वडा नं. १५ घर भई हाल काठमाडौं बाँसबारीस्थित बाँसवारी रेष्ट्रो एण्ड क्याफेका मेनेजर ४२ वर्षीय मुकेश माली रहेका छन् ।

आरोपित मालीले लजमा बस्न आउने गेस्ट (पाहुना)को गोप्य रूपमा अश्लील भिडिओ बनाउने गरेको पाइएको प्रहरीले जनाएकाे छ । मालीले लजको कोठामा प्वाल बनाएर पाहुनाको गोप्य भिडिओ खिच्ने गरेकाे पाइएकाे जिल्ला प्रहरी परिसर काठमाडौंले जनाएको छ ।

प्रहरीका अनुसार मालीको साथमा रहेको मोबाइल फोन नियन्त्रणमा लिई चेक जाँच गर्दा उक्त फोनमा गेस्ट हाउसमा बस्ने गरेका विभिन्न व्यक्तिका रेकर्डेड भिडिओ फेला परेको छ ।

उनीउपर मुलुकी अपराध संहिता २०७४ को परिच्छेद-५ को ‘सार्वजनिक हित, स्वास्थ्य, सुरक्षा, सुविधा र नैतिकता विरुद्धका कसूर’ अन्तर्गत दफा ११८ ‘अभद्र व्यवहार गर्न नहुने’ मुद्दामा अनुसन्धान भइरहेको प्रहरीले जनाएको छ ।