कालीकोटको खाडाँचक्र नगरपालिका–२,जितेगडास्थित कर्णाली नदीमा बनाइएको झालुङ्गे पुलको फोटो अहिले सामाजिक सञ्जालमा चर्चामा छ। पुल चढ्न वनाईएको भ-याङका कारण उक्त फोटो चर्चामा आएको छ।

‘पूर्वाधार विकासको नेपाल ढाँचा’ भन्दै उक्त पुललाई लिएर ब्यंग्य भईरहेको छ। ब्यंथ्यको केन्द्रमा छन्, कर्णालीका पूर्वमुख्यमन्त्री महेन्द्रबहादुर शाही। झोलुङ्गे पुलमा भ-याङ हालिएको उक्त तस्बिर कर्णालीका पूर्वमुख्य मन्त्री महेन्द्रबहादुर शाहीको गृहजिल्लामा पर्छ।

जितेगडास्थित कर्णाली नदीमा बनाइएको उक्त पुल पुरानो र जीर्ण बनिसकेको छ। दसैँलगत्तैको बाढीले पुलको आधा भाग बगाएको थियो। कालीकोटको जितेगडा पुगेका नागरिकले नरहरिनाथ, सान्नीत्रिवेणी, पँचालझरना, पलाता गाउँपालिका र रास्कोट नगरपालिका आवतजावतका लागि यही पुलको प्रयोग गर्दै आएका थिए।

बाजुरा र हुम्ला जान पनि यही पुल प्रयोग हुने गरेको छ। बाढीले पुल प्रयोग गर्न नमिल्ने भएपछि त्यहाँका यतायात र होटल व्यवसायीले गत कार्तिक १० गते पुलमा चढ्न भ-याङ लगाएका छन्। 

उक्त पुलको फोटो आइतबारदेखि सामाजिक सञ्जालमा चर्चित छ। कतिपयले कर्णालीका पूर्वमुख्यमन्त्री शाहीलाई कटाक्ष गर्दै फेसबुकमा फोटो पोष्ट गरेका छन्। फोटोले संघीय सरकारमा ऊर्जा मन्त्री र कर्णालीको पहिलो मुख्य मन्त्री बनेर करिब चार वर्ष सरकार चलाएका शाहीलाई गिज्याइरहेको स्थानीय बताउँछन्। 

शाहीले भने राजनीतिक पूर्वाग्राहका कारण वाढिले पुल बगाएको दोष आफूमाथि लगाईएको बताए ।