नेकपा एमालेका नेता घनश्याम भूसालले परित्याग गरेको घोषणा गरेपछि गठबन्धनका नेताहरु आफुहरुसँग मिलेर चुनाव लड्न उनलाई फकाउन थालेका छन्।

सत्ता गठबन्धनको भागवण्डामा रुपन्देही १ माओवादी केन्द्रको भागमा परेको छ । माओवादी नेताहरुले भुसाललाई आफ्नो दलको चुनाव चिह्न लिएर चुनाव लड्न समेत प्रस्ताव गरेका छन् ।

तर भुसालले भने रुपन्देही १ मै स्वतन्त्र उम्मेदवारी दिने तयारी थालेका छन्। निकटका नेताहरुका अनुसार भूसालले रुपन्देही १ बाटै स्वतन्त्र उम्मेदवारी दिने तयारी गरेका छन् ।

कुनै दलको चुनाव चिह्नमा नलड्ने उनको भनाई छ। स्रोतका अनुसार भुसालले स्वतन्त्र उम्मेदवारी दिने र गठबन्धनले समर्थन गर्ने सम्भावना छ ।

एमालेले प्रतिनिधिसभाको टिकट नदिएपछि एमालेका स्थायी कमिटी सदस्य समेत रहेका भूसालले शनिबार दिउँसो पार्टी परित्यागको घोषणा गरेका थिए। पार्टीमा नीति र विधिको पुनर्स्थापना हुने कुनै सम्भावना नदेखेको र अध्यक्ष केपी शर्मा ओलीसँगै रहेर आन्दोलन र आफैंप्रति पनि इमान्दार रहन नसक्ने भएपछि एमालेमा नबस्ने निर्णय गरेको उनले बताएका छन् ।

‘म स्वयम्ले ४५ वर्षसम्म आफ्नो सम्पूर्ण सामर्थ्य समर्पित गरेको यो पार्टीमा नीति र विधिको पुनर्स्थापना हुने कुनै सम्भावनासमेत नदेखेपछि, अध्यक्ष ओलीसँगै रहेर आन्दोलन र आफैप्रति पनि इमान्दार रहन नसकिने भएपछि यस पार्टीमा नरहने निष्कर्षमा पुगेको छु’ भूसालले सामाजिक सन्जालमा लेखेका छन्–‘नेकपा एमाले भित्र रहँदा विधि, पद्धति र सही नीतिका लागि सङ्घर्षमा लागेका सहयोद्धा र सहकर्मीहरुप्रति सदा मेरो ऐक्यवद्धता रहनेछ । राष्ट्रको सर्वोपरी हितका लागि म उत्तिकै सक्रिय रहने छु । कमरेडहरु ! सत्य र सही बाटाको खोजमा इतिहासको कुनै विन्दुमा हामी पुनः भेट हुनेछौं ।’

घनश्याम भूसाल