नेकपा माओवादी केन्द्रका धेरै नेता यस पटक टिकटबाट बन्चित भएका छन्।

दाङ क्षेत्र नं. २ बाट चुनाव लड्ने तयारीमा रहेका उपाध्यक्ष तथा पुर्व सभामुख कृष्णबहादुर महराले पनि टिकट पाएका छैनन् । महराको क्षेत्रबाट माओवादीले रेखा शर्मालाई टिकट दिएको छ ।

समानुपातिक बन्द सूचिमा राखिएको महराको नाम अन्तिम समयमा आएर त्यहाँबाट पनि हटाइएको छ।

सिन्धुली क्षेत्र नं. २ बाट टिकट पाउनेमा ढुक्क भएका माओवादी केन्द्रका उपमहासचिव हरिबोल गजुरेलले पनि अन्तिम समयमा आएर टिकट पाएनन् । सिन्धुली क्षेत्र नं. २ बाट राजन दाहालले टिकट पाएका छन्।

०७४ सालमा झापा क्षेत्र नं. १ बाट वाम गठबन्धनबाट चुनाव जितेका माओवादी केन्द्रकै सचिव सुरेन्द्र कार्कीले पनि अन्तिम समयमा आएर टिकट पाएका छैनन् । कार्कीले योपटक पनि सोही क्षेत्रबाट चुनाव लड्ने तयारी गरेका थिए ।

सत्ता गठबन्धनमा जसले जुन क्षेत्र जितेको छ, त्यही क्षेत्र उक्त दललाई दिने सहमति भएको पनि थियो । तर, कांग्रेसका महामन्त्री विश्वप्रकाशले पनि उक्त क्षेत्रबाट नै चुनाव लड्ने भएपछि कार्कीलाई टिकट नदिइएको जनाईएको छ ।

अघिल्लो पटक जितेर पनि टिकट नपाउनेमा माओवादीका नेतामा कार्की पनि परेका छन् । कार्कीले ओखलढुङ्गाबाट पनि टिकट पाउने चर्चा चलेको थियो । तर, ओखलढुङ्गामा पनि भागवण्डामा कांग्रेसको भाग परेको छ ।

काठमाडौं क्षेत्र नं. ३ बाट चुनाव लड्ने तयारीमा रहेका सचिव हितमान शाक्यले पनि टिकट पाएनन् । सचिव गणेश साहले पनि टिकट पाएनन् । 

अग्नि सापकोटाले भने अन्तिम समयमा आएर सिन्धुपाल्चोकबाट चुनाव नलड्ने घोषणा गरेका छन् । उनले अन्तिम समयमा आएर आफ्नै भतिजोलाई टिकट दिलाएर आफू चुनाव नलड्ने भएका हुन् । 

कृष्णबहादुर महरा हरिबोल गजुरेल सुरेन्द्र कार्की गणेश साह हितमान शाक्य