नेपाली काँग्रेसका केन्द्रीय सदस्य चीनकाजी श्रेष्ठले टिकट वितरणमा सभापति शेरवहादुर देउवाले पोईसाको चलखेल गरेको आरोप लगाएका छन् । हालै सार्वजनिक भएको श्रेष्ठको एउटा अडियो क्लिपमा गोरखामा जनजाति सिद्याउन बाहुनहरुले गठबन्धन गरेको आरोप छ।

सभापति देउवाले आफुलाई धोका दिएर गोरखा १ मा काँग्रेसका युवा नेता राजेन्द्र बजगाईलाई उम्मेदवार बनाएको श्रेष्ठको आरोप छ। ‘कुनै पनि कमी कमजोरी छैन, अन्तिममा पैसाको चलखेलले भ्याट्टै पारिदिए’ श्रेष्ठले भनेका छन्–‘यति अत्याचार छ, के गर्ने ? राजनीतिमा विकृति भित्रियो।’ 

गोरखामा गठबन्धनका २ प्रतिनिधिसभा उम्मेदवार र ४ जना प्रदेशसभा उम्मेदवार बाहुन भएको र जातीय सम्प्रदायका कारण आफ्नो टिकट खोसिएको पनि उनले बताएका छन् । ‘६ जना नै बाहुन छन्, बल्लबल्ल गरेर अनेक गरेर टिकेको हामीलाई स्वाट्टै पारिदियो’ अडियोमा भनिएको छ–‘भित्र चाहिँ साम्प्रदायिक छ, विकृति विसंगति छ।’

पूर्व प्रधानमन्त्री बाबुराम भट्टराईले गोरखा २ मा प्रचण्डलाई ल्याएर छोरी मानुषी यमी भट्टराईलाई ‘सेटल गराउन’ चाहेको श्रेष्ठको आरोप छ । प्रचण्ड आउनुमा गोरखा १ का उम्मेदवार राजेन्द्र बजगाईँको पनि हात रहेको उनले बताएका छन् ।

‘बाबुरामले पनि छोरीलाई बनाउनुपर्ने । एउटा काँग्रेस र अर्को बाबुरामले लियो भने उसलाई आउने सम्भावना कम हुन्छ । मान्छे इरिटेड भएका थिए’ उनले भनेका छन्–‘बाबुरामले आफुलाई गाह्रो हुन्छ छोरी र महेन्द्र यादवलाई मिलाउनुपर्यो । नारायणकाजीले पनि छोडेपछि प्रचण्डलाई सजिलो भयो ।’