कात्तिक २७ गते राष्ट्रिय स्वतन्त्र पार्टीका सभापति रवि लामिछानेको घरदैलो कार्यक्रममा प्रयोग भएको गाडी तोडफोड भएको थियो । घरदैलोका क्रममा मुग्लिन नजिक गाडी तोडफोड भएको हो । लामिछानेको गाडी तोडफोडमा संग्लनलाई प्रहरीले पक्राउ गरेको छैन । 

लामिछानेको गाडी तोडफोड भएको तीनदिनपछि चितवन क्षेत्र नम्बर २ मा सत्ता गठबन्धनबाट उम्मेदवार रहेका नेपाली कांग्रेसका नेता उमेश श्रेष्ठको गाडी तोडफोड भएको छ । श्रेष्ठ र लामीछानेको निर्वाचन क्षेत्र एउटै हो । 

आज बिहान भरतपुरमा रोकिराखेको गाडी अज्ञात समूहले तोडफोड गरेपछि लामिछानेको समुहका सदस्यले बद्ला लिएको हुन सक्ने आशंका गरिएको छ । 

चुनावी अभियानमा श्रेष्ठ चढ्ने गरेको बा ३ च २०४० नम्बरको गाडीको सिसा फुटेको छ ।

मोटरसाइकलमा आएका तीन जनाले ढुंगा हानेर गाडीका सिसा फुटाएको र उक्त समूहको खोजी भइरहेको चितवन प्रहरीले जनाएको छ ।

भरतपुर महानगरपालिका वडा नम्बर १० मा भएको चुनावी घरदैलो र कोणसभाका लागि श्रेष्ठ सहभागी हुँदै गर्दा पार्किङ गरिराखेको गाडी तोडफोड भएको हो ।