रेशम चौधरीको उम्मेदवारी खारेज भएको क्षेत्रमा रेशमकै बुवा निर्वाचित
नागरिक उन्मुक्ति पार्टीको तर्फबाट बर्दिया–२ मा प्रतिनिधिसभा सदस्यको उम्मेदवारी मनोनयन गरेका रेशम चौधरीको उम्मेदवारी निर्वाचन आयोगले खारेज गरेको थियो । टीकापुर घटनामा दोषी ठहर भई कारागारमा रहेका रेशम चौधरीको उम्मेदवारी खारेज भएको थियो ।
रेशमको उम्मेदवारी खारेज भएपछि उनका बुवा लालवीर चौधरीले सोही निर्वाचन क्षेत्रमा स्वतन्त्र उम्मेदवारी दिएका थिए । मत परिणाम अनुसार बर्दिया क्षेत्र नं २ मा प्रतिनिधिसभा सदस्यका लागि स्वतन्त्र उम्मेदवार लालवीर चौधरी निर्वाचित भएका छन् ।
गठबन्धनबाट नेकपा माओवादी केन्द्रका सुरेश पन्थलाई १ सय ३६ मतले पछि पार्दै उनी निर्वाचित भएका हुन् । चौधरीले २६ हजार पाँच सय २० मत ल्याउँदा उनका निकटतम प्रतिद्वन्द्वी माओवादीका पन्थले २६ हजार तीन सय ८४ मत ल्याए ।
रेशमको उम्मेदवारी खारेजी भएपछि नागरिक उन्मुक्ति पार्टीले स्वतन्त्रमा उम्मेदवारी दिएका लालवीर चौधरीलाई सहयोग गरेको थियो ।
रेशम चौधरी
