साहित्य सम्बन्धी समाचार प्रकाशन गर्ने एक चर्चित अनलाइनले एउटा कविता प्रकाशन गर्यो । कविताको शीर्षक थियो ‘तिम्रो योनीमा अणु बम पड्काउन चाहन्छु ।’ अनलाइनका सम्पादक लामो अनुभवी पत्रकार तथा साहित्यकार हुन् । थुप्रै नाम चलेका पत्रपत्रिकामा काम गरिसकेका ती सम्पादक यसपालि भने चिप्लिएका छन् । 

‘तिम्रो योनीमा अणु बम पड्काउन चाहन्छु’ शीर्षकको कविता प्रकाशन भएकाे केही समयपछि  डिलिट भएको छ । उक्त कविताले महिला हिंसालाई प्रबर्द्धन गरेको भन्दै आलोचना भइरहेकाे छ । लेखक, साहित्यकार तथा महिला अधिकारकर्मीले आपत्ति जनाइरहेका छन् ।

लेखक सुमिनाले उक्त कवितालाई सञ्चारमाध्यममा स्थान दिन नहुने भन्दै आपत्ति जनाएकी छन् । ‘योनिमा अणुबम पड्काउन चाहन्छु’ टाइपका हिंसालाई प्रबर्द्धन गर्ने, महिलालाई फगत योनि भन्दामाथि नदेख्ने, यौनको साधन सोच्ने र चरम घृणा ओकल्ने कुण्ठित कवितालाई आफ्नो स्वविवेक प्रयोग नगरी किन प्रकाशन गर्छन्? पनि केही समयपछि डिलिट गर्नुपर्ने गरि,’ सुमिनाको आपत्ति छ । 

अर्की महिला साहित्यकारले टिप्पणी गरेकी छन्, ‘जसको गर्भबाट जन्म्यो उसैलाई अणुबम हान्ने ! यो भन्दा लज्जास्पद  चिज के होला?’

प्रकाशन भएको समाचार सुटुक्क डिलिट गर्नु पत्रकार आचारसंहिताविपरित हो । पत्रकार आचारसंहिता, २०७३ अनुसार अनलाइन सञ्चारमाध्यमले सामग्री सम्प्रेषण गर्दा पहिले नै राखिएको जस्तो देखाउने गरी पुरानो मिति र समय उल्लेख गर्न र एकपटक प्रकाशित सामग्री प्रकाशन पश्चात हटाउन हुँदैन ।  तर असावधानीवश पोस्ट हुन गएका गम्भीर क्षति पुर्याउने खालका सामग्री घटाउँदा त्यस्तो सामग्रीको प्रकृति खुलाई क्षमायाचना गर्नुपर्दछ । उक्त अनलाइनले भने सुटुक्क पोर्टलबाट कविता हटाएको छ । 

प्रकाशन भएको अनलाइनको लिङ्क खोलेर हेर्दा ‘खै के भो. तपाईंले खोज्नुभएको सामाग्री भेटिएन त!’ सन्देश देखिन्छ । 

सञ्चार माध्यममा प्रकाशित सामग्रीमा प्राप्त हुने असान्दर्भिक, अमर्यादित, अश्लील टिप्पणी वा सामग्रीलाई स्थान दिनुपनि आचारसंहिता विपरित हो ।

पोस्ट डिलिटबारे सम्पादकले स्पष्टिकरण दिनुपर्ने माग पनि केही व्यक्ति को छ । 

 

डिलिट