हार्ने सम्भावना वढेपछि पूर्वप्रधानमन्त्री झलनाथ खनालले आफ्नो निर्वाचन क्षेत्रको चुनावमा धाधँली भएको आरोप लगाएका छन् । २ हजारभन्दा वढि मतले पछि परेपछि खनालले पुनः मतदान गर्नुपर्ने माग समेत गरेका छन् ।

‘सुरुबाटै त्रुटिहरु देखिएका छन् । खसेको भन्दा धेरै गणना कसरी हुन्छ ?’ खनालले भनेका छन्–‘कुनै ब्रम्हाले ल्याएर त त्यहाँ राखेनन् होला । त्यो धाँधलीकै प्रमाण हो ।’

पछिल्लोपटक गणना भएको ६ वटा केन्द्रको मत गणना गर्दा खसेको भन्दा २६६ बढी मत गणना भएको उनको आरोप छ। नेकपा एकिकृत समाजवादीका नेता खनालले यस वारे पत्रकार सम्मेलनको आयोजना गर्दैछन् ।

‘मैले प्रमुख निर्वाचन आयुक्तसँग पनि कुरा गरें, उहाँसँग पनि यसको जवाफ छैन,’ पूर्वप्रधानमन्त्री खनालले भने, ‘अब रिपोलिङको विकल्पै छैन ।’ यसअघि पनि ५५५ मत हराएको भन्दै मतगणना स्थगित भएको थियो ।

पछिल्लो गणनाअनुसार, इलाम–२ मा नेकपा एमालेका महेश बस्नेतले अग्रतालाई लिइरहेका छन् भने खनाल तेस्रोमा छन् । वस्नेतले १८ हजार ५४२, मंगोल नेशनल अर्गनाइजेसनका बुद्धलाल मेचेले १७ हजार ८२२ र खनालले १६ हजार ८७ मत पाएका छन् ।