नेकपा क्रान्तिकारी माओवादीका महासचिव मोहन वैद्यले नेकपा माओवादी केन्द्रका अध्यक्ष पुस्पकमल दाहाललाई प्रतिगमकारी भन्दै टिप्पणी गरेका छन् । दाहालले नेकपा एमालेका अध्यक्ष केपी शर्मा ओलीलाई प्रतिगमनकारी भनिरहेका वेला वैद्यले भने दाहालहरु नै प्रतिगमनकारी भएको आरोप लगाए ।

बुधवार काठमाडौंस्थित शान्तिबाटिकामा नेकपा (क्रान्तिकारी माओवादी), नेकपा(मशाल), नेकपा(बहुमत) र माओवादी कम्युनिष्ट पार्टी, नेपालको संयुक्त आयोजनामा गरिएको निर्वाचन बहिस्कार सभामा बोल्दै उनले नयाँ क्रान्तिको तयारीका लागि निर्वाचन बहिष्कार गरिएको बताए।

निर्वाचन आयोगले आफूहरुलाई दमन गरिरहेको पनि उनले बताए । आफूहरु निर्वाचनको बहिष्कारको पक्षमा रहेकाले आचारसंहिता नलाग्ने जिकिर गरे । शान्तिपूर्ण तरिकाले प्रचारप्रसार गर्दा अवरोध भएको भन्दै सत्तारुढ गठबन्धनका नेता पुष्पकमल दाहालमाथि आक्रोश पोखे ।

दाहालहरुले प्रतिगमनको बिरुद्धमा लडेको भनेपनि आफूहरु माथि प्रतिगमन गरेको उनको आरोप छ। जनताको मौलिक अधिकारलाई खोसेर कुन प्रतिगमनकाविरुद्ध लड्ने हो ? भन्दै उनले प्रश्न गरे । ‘हामी बहिस्कारवादीलाई किन लाग्ने त्यो आचारसंहिताता ? भन्छन् लोकतन्त्र, शान्तिपूर्ण तरिकाले प्रचारप्रसार गर्दाखेरी माइक भाँचिदिने, पर्चा, पम्प्लेट लुट्ने, नेता, कार्यकर्ताहरुलाई गिरफ्तार गरेर राख्ने’ उनले भने–‘यो के तरिका हो ? यही हो लोकतन्त्र । प्रचण्डजीहरु भन्नुहुन्छ प्रतिगमनको बिरुद्ध। यहाँभन्दा ठूलो प्रतिगमन के हो ? जनताको मौलिक अधिकारलाई खोस्ने, अनि कुन प्रतिगमनका बिरुद्ध लड्ने हो ? प्रतिगमन त उहाँहरुले नै गरिरहनुभएको छ । यो के लोकतन्त्र हो ? लोकतन्त्र फाँसिवादतिर गइराखेको छ ।’