सात दिनभित्र प्रधानमन्त्रीको नाम दिन दलहरुलाई राष्ट्रपतिको आव्हान
राष्ट्रपति विद्यादेवी भण्डारीले आईतवार सात दिनभित्र नयाँ सरकार गठनका लागि आव्हान गरेकी छन् । दुई वा दुईभन्दा बढी दलको समर्थन लिएर प्रधानमन्त्रीको नाम दिन राष्ट्रपतिले आव्हान गरेकी छिन्।
निर्वाचन परिणामसहितको प्रतिवेदन प्राप्त भएकोले संविधानको धारा ७६ को उपधारा (१) बमोजिम कुनै पनि दलले स्पष्ट बहुमत नदेखिएको अवस्थामा धारा ७६ को उपधारा (२) बमोजिम राष्ट्रपतिबाट सरकार गठन प्रक्रियाका लागि आव्हान भएको हो ।
उक्त धाराअनुसार प्रतिनिधिसभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रतिनिधिसभाको सदस्यलाई प्रधानमन्त्री नियुक्त गर्नका लागि पुस १० गते आइतबार अपरान्ह ५ बजेभित्र दाबी पेस गर्न राष्ट्रपतिबाट आव्हान भएको शीतल निवासले विज्ञप्ति निकालेर जनाएको छ ।
