माओवादीका अध्यक्ष पुष्पकमल दाहाललाई प्रधानमन्त्री बनेपछि सत्ता गठबन्धनमा लगातार शक्ति बाँडफाँटको छलफल भईरहेको छ। नेकपा एमालेले चारवटा प्रदेश सरकार रोजेर लिने भएको छ । तर, शीर्ष तहमा औपचारिक रूपमा कुन प्रदेश कसले पाउने भन्ने टुंगो भने लागिसकेको छैन ।

एमाले नेताले भने आफुहरुले पाउने प्रदेश प्रष्टै रहेको बताएका छन् । स्थायी कमिटी सदस्य संसदीय दलको नेता भएका ठाउँमा माओवादीको दाबी नरहने उनीहरुको भनाई छ। वागमती र लुम्बिनीमध्ये एमाले तथा माओवादीले एक–एकवटा बाँड्ने नेताहरु बताउँछन् ।

एमालेका तीनजना स्थायी कमिटी सदस्य प्रदेशमा चुनाव लडेका थिए । तीमध्ये हिक्मत कार्की प्रदेश १, खगराज अधिकारी गण्डकी र यामलाल कँडेल कर्णालीमा संसदीय दलको नेता चयन भइसकेका छन् । यी नेता मुख्यमन्त्री बन्ने तय भइसकेको र यसमा शीर्ष तहमै टुंगो लागिसकेको छ ।

एमालेले यी तीन प्रदेशबाहेक वागमती वा लुम्बिनीको नेतृत्व पाउनेछ । यसपटक उत्कृष्ट नतिजा दिने प्रदेशमध्ये वागमतीभन्दा लुम्बिनी रहेकाले एमालेको स्थानीय नेतृत्वले लुम्बिनीको दावी गरेको छ । तर संघीय राजधानी समेत रहेको प्रदेश भएकाले एमालेको दावी वागमतीमा पनि यथावत छ ।

वागमति संसदीय दलमा चितवनका जगन्नाथ थपलिया सर्वसम्मत चयन भइसकेका छन् । लुम्बिनीमा एमालेका सिनियर नेतामध्ये रुपन्देहीका लीला गिरी नै मुख्यमन्त्रीका दाबेदार हुन् । वागमतिमा माओवादीबाट शालिकराम जमरकट्टेल, सरल सहयात्री र युवराज दुलाल दाबेदार छन् ।

लुम्बिनीमा प्रधानमन्त्रीका प्रमुख स्वकीय सचिव रहिसकेका नेता जोखबहादुर महरा दाबेदार छन् । ओली र दाहालकै तहमा छलफलपछि वागमति र लुम्बिनीको टुंगो लाग्ने नेताहरुले बताएका छन् । यसबाहेक माओवादीले सुदूरपश्चिमको पनि नेतृत्व पाउनेछ । मधेस प्रदेशमा भने पेचिलो अवस्था छ ।

प्रदेशसभामा एमाले सबैभन्दा ठूलो दल हो । तर, यहाँ तीनभन्दा बढी दल मिलेरमात्र सरकार बन्ने अवस्था छ । जसपा र जनमत पार्टीको आधार क्षेत्र भएकलो दुवैले मुख्यमन्त्री दाबी गरेका छन् । सत्ता गठबन्धनमा यसबारे सहमति गरेर आलोपालो हुनसक्ने सम्भावना छ ।