भारतको राष्ट्रिय जनता दलका अध्यक्ष लालुप्रसाद यादवको आज मिर्गौला प्रत्यारोपण हुने भएको छ। 

लालु यादवको सिङ्गापुरको माउन्ट एलिजाबेथ अस्पतालमा शल्यक्रिया गरिने भएको छ । लालु यादवकी छोरी रोहिणी आचार्यले बुवालाई मिर्गौला दान गरेकी छन् । उनले अस्पतालबाट एउटा तस्विर शेयर गर्दै मानिसहरूलाई प्रार्थना गर्न आग्रह गरेकी छिन् ।

रोहिणी आचार्य सिंगापुरमा बस्छिन् । मिर्गौला म्याच भएपछि रोहिणीले ट्विट गरेकी थिइन्, ‘जुन पिताले यो दुनियाँमा मलाई आवाज दिनुभयो, जो मेरो सबथोक हुनुहुन्छ, उनका लागि यदि मैले जीवनको सानै भएपनि योगदान दिन पाउँछु भने यो त मेरो परम सौभाग्य हुनेछ । धर्तीमा भगवान भनेको आमा–बुवा मात्रै हुन्, उनीहरुको पूजा र सेवा हरेक सन्तानको कर्तव्य हो ।’

राजद प्रमुख लालुप्रसाद यादवका नौ सन्तान छन् भने रोहिणी आचार्य उनकी दोस्रो नम्बरकी छोरी हुन् । गत महिना रोहिणी आचार्य र लालुप्रसाद यादवको मिर्गौला म्याच भएको थियो । राजदका प्रमुख लालु लामो समयदेखि विभिन्न रोगबाट पीडित छन् । उनलाई मधुमेह र उच्च रक्तचाप जस्ता रोग पनि छन् ।

गत जुलाईमा लालुप्रसाद यादव पटनास्थित आफ्नै घरमा लडेका थिए, जसका कारण उनी नराम्ररी घाइते भएका थिए ।