पाल्पाको बगनासकाली गाउँपालिका–१, चिर्तुङधारा निवासी दानबहादुर गाहाकी छोरीको बिहे भोज खाएका करिव ८० जना स्थानीयवासी विरामी परेका छन् । चिर्तुङधारास्थित बुढाखान्डे, भाङजेली, अम्रेली, पिपरटुङ, ढाडटोल र घोरबन्दा गाउँका सर्वसाधारण बिरामी परेका हुन् ।

बिरामी भएकाहरुलाई ज्वरो आउने, पखाला लाग्ने, टाउको दुख्ने, वाकवाकी लाग्ने, वान्ता हुने लगायतका समस्या देखिएको छ। अधिकांशलाई औषधि वितरण गरिएको छ । तर औषधिले काम नगरेपछि स्थानीय स्वास्थ्य संस्था, तानसेनका निजी स्वास्थ्य संस्था र मिसन अस्पतालमा पुगेका थिए ।

मिसन अस्पतालका अनुसार सोमबार २२ जना बिरामी उपचारका लागि आएका थिए । त्यसमध्ये चार जनालाई भर्ना लिएर उपचार गर्नु परेको छ । अस्पतालका व्यवस्थापकका अनुसार सबै बिरामी खतरामुक्त भएपछि घर गएका छन् ।

वडाध्यक्ष शेरबहादुर रानाका अनुसार बिहे भएको घरमा गएर भोज खाने प्रायः सबै बिरामी परेकाले समस्या आएको छ । के कारणले ‘फुड पोइजन’ भयो भन्ने अनुमानसमेत गर्न नसकेकिएको वडाध्यक्ष रानाले बताए । यहाँ प्युठान नगरपालिका–६, गुरुङगाउँबाट जन्ती आएका थिए ।

भोजमा पाडा (राँगो) को मासु, पुलाउ, आलु र गोभीको तरकारी, मेवाको अचार, बटुक, आलु मुलाको अचार थियो । कतिपयले पानी धमिलो देखिएको र पानीकै कारण पनि हुन सक्ने आशंका गरेका छन् । प्यूठानमा समेत भोज खाएर गएकाहरु बिरामी परेका छन् । जन्ती आएका प्यूठानका एकै गाउँका ४५ जना बिरामी परेका छन् ।