राष्ट्रिय एकता अभियानले भारतका प्रसिद्ध विद्वान, संविधान निर्माता डा. भिमराव अम्बेडकरको स्मरणमा एक कार्यक्रमको आयोजना गरेको छ।

अम्बेडकरले ६५ वर्ष अघि ६ डिसेम्बरका दिन देहत्याग गरेका थिए। सन १९५६ मा उनको स्वर्गबास भएको थियो। यहि सन्दर्भमा राजधानि काठमाडौंमा अभियानले कार्यक्रमको आयोजना गरेको हो ।

उनले भनेका थिए–‘जबसम्म तिमीले समान अवसर, स्वतन्त्रता र सामाजिक न्याय हासिल गर्न सक्दैनौं, कथित ‘लोकतन्त्र’ले जुनसुकै हकअधिकार दिएपनि त्यो तिम्रो लागि कुनै कामको हुँदैन।’ भारतीय समाजमा हरेक जाति, वर्ग र समुदायका प्रिय डा. अम्बेडकर विश्वकै सबैभन्दा ठूलो संघीय लोकतान्त्रिक गणतन्त्रात्मक देश भारतका संविधान निर्माता हुन् ।

अहिले भारत जुन विकास, उन्नति र समृद्धिको सपनासहित महाशक्ति राष्ट्रको रुपमा उदय हुँदैछ, त्यो डा. अम्बेडकरद्वारा लिखित संविधानको जग र बलमा मात्र सम्भव रहेको कार्यक्रमका वक्ताहरुले बताए । 

आम्बेडकरको विचार र सिधान्तको गलत व्याख्या भइरहेको भन्दै उनको स्वतन्त्रता, समानता र समावेशी सिद्धान्तको आधारमै सामाजिक सद्भाव कायम हुन सक्ने उनिहरुले बताए । आफ्ना क्रान्तिकारी र सुधारवादी विचारका आधारमा विश्वभर परिचित डा आम्बेडकर नव भारतको निर्माणमा भुमिका खेल्ने एक एतिहासिक एवम सम्मानित राजनेता भएको अभियानका अध्यक्ष विनय यादवले वताए ।

यादवका अनुसार अम्वेडकरलाई कुशल अर्थशास्त्री, राजनीतिज्ञ र समाजसुधारकको रूपमा भारत बाहिर पनि स्मरण गर्ने गरिएको छ ।

सनातन धर्म भित्रको विकृति र विसङ्गति बिरुद्ध अभियान चलाएर धर्म र संस्कृतिको स्वच्छतामा योगदान दिएका डा आम्बेडकरलाई एक श्रेष्ठ मानवतावादी नेताको रुपमा स्मरण गर्दै अभियानका अध्यक्ष यादवले सनातन धर्मको सबलताका लागि जातीय छुवाछूत लाई गम्भिर समस्याको रुपमा इगिंत गरेका छन् ।

कार्यक्रमका प्रमुख अतिथि मधेशी आयोगकी सदस्य रेणु साहले राष्ट्रिय एकता अभियानको प्रशंसा गरिन। राष्ट्रियता र मौलिक पहिचानका लागि लडिरहेको अभियानलाई नैतिक समर्थन र सहयोग रहने उनको भनाई थियो।

कार्यक्रममा अभियानका केन्द्रिय सदस्य चन्द्र यदुवंशी, मिनादेवी साह, युवा अभियन्ता राजीव देव, अभियान निकट विधार्थी परिषदका पप्पू यादव लगायतले बोलेका थिए ।