नेपालमा चीनियाँ हेपाहा प्रवृत्तिको श्रृंखला एकपछि अर्को थपिदै गएको छ। पछिल्लो समय पूर्व–पश्चिम राजमार्गलाई चार लेन बनाउने ठेक्का पाएको चिनियाँ कम्पनी चाइना रेल्वे नम्बर २ इन्जिनियरिङ ग्रुपले ढुङ्गा गिटीको अवैद्य उत्खनन सुरु गरेको छ।

नदीजन्य पदार्थ झिक्न कम्पनीले अनुमति लिएको छैन । तर, धनुषाको कमला नदीमा ढुंगा–गिट्टीको अवैध उत्खनन गरिरहेको छ। नदीजन्य पदार्थको उत्खनन र ढुवानीमा प्रयोग गरिएका गाडी र उपकरणहरू धनुषा प्रहरीले नियन्त्रणमा लिएपछि यो तथ्य वाहिर आएको हो।

प्रहरीले गणेशमान चारनाथ–५ स्थित कमला खोलामा अवैध उत्खनन गरिरहेको अवस्थामा आइतबार साँझ ग्रुपका ७ टिपर र १ एक्स्काभेटर नियन्त्रणमा लिइएको हो।

कम्पनीले ढुंगा–गिट्टी सिरहाको कर्जन्हास्थित यार्डमा थुपारिरहेको छ। कम्पनीले मेसिनबाट बालुवा–गिट्टी खनेर लग्ने गरेको थियो । उत्खनन स्थलमा प्रहरी पुग्दा चालकहरू फरार भएपछि टिपर र एक्स्काभेटर नियन्त्रणमा लिएको जिल्ला प्रहरी कार्यालय धनुषाले जनाएको छ।

टिपर र एक्स्काभेटर पक्राउ परेपछि चिनियाँ ठेकेदार कम्पनीले जनप्रतिनिधिमार्फत धनुषा प्रहरीमाथि दबाब बढाएको छ । कर्जन्हा नगरपालिकाका उपमेयर ज्ञानु श्रेष्ठले कमलामा उत्खनन गर्न आफूले अनुमति दिएको दावी गरेकी छिन् । नियन्त्रणमा लिइएको सवारीसाधन छोड्न उनको दबाब वढिरहेको धनुषा प्रहरीले जनाएको छ। 

यस विषयमा कम्पनीका प्रतिनिधिले सार्वजनिक प्रतिक्रिया दिएका छैनन्।