नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले बेलायतमा रहेका अन्तर्राष्ट्रिय कानुनका प्राध्यापक सूर्य सुवेदीले पठाएको गोप्य पत्रको भरोसामा व्याख्यात्मक घोषणासहित एमसीसी अनुमोदन गरेको वताएका छन् ।

आफ्नो निवास खुमलटारमा आज आयोजित पत्रकार सम्मेलनमा बोल्दै उनले सुवेदीको चार पृष्ठ लामो गोप्य पत्रमा व्याख्यात्मक घोषणासहित अघि वढ्न सुझाएका कारण आफू यसमा दृढ भएर अगाडि बढेको जानकारी दिएका थिए ।

अध्यक्ष दाहाल पत्रकार सम्मेलनमा प्राध्यापक सुवेदीले लेखेको पत्र नै बोकेर प्रस्तुत भए पनि त्यसमा लेखिएका विषय भने पढेर सुनाएनन् । आफुले सबैभन्दा सुरुमा पूर्व परराष्ट्र सचिव तथा सार्कका पूर्वमहासचिव अर्जुन थापासँग यस विषयमा सल्लाह गरेको बताए । यसैगरी, वरिष्ठ अधिवक्ता गोविन्द बन्दीसँग पनि सल्लाह गर्दा एमसीसी सम्झौतालाई संसद्बाट व्याख्यात्मक घोषणासहित पारित गरे त्यसले कानुनी मान्यता पाउँछ भन्ने सुझावपछि आफूले उक्त प्रस्तावलाई अगाडि बढाएको दाहालले दाबी गरे ।

एमसीसी अनुमोदनका क्रममा नेकपा एमालेका नेता भीम रावलले व्याख्यात्मक घोषणालाई ठग पत्र भनेको विषयमा उनले त्यो गठपत्र नभएको वताए । ‘मैले विज्ञहरुसँग छलफल गरेर स्पष्ट भएपछि नै यसलाई अगाडि बढाउन प्रस्ताव गरेको हुँ। हाम्रो संसद्ले पारित गरेको व्याख्यात्मक घोषणा अमेरिकाले पनि मान्नुपर्छ र उसले मान्छ भन्ने विषयमा दूतावासबाट पनि सकारात्मक प्रतिक्रिया आएको छ । त्यसैले पनि यसलाई अगाडि बढाउन सजिलो भएको हो’– उनले भने।
 

पुष्पकमल दाहाल ‘प्रचण्ड’ एमसीसी