नेकपा एमालेका नेता भीम रावलले वामन्थीहरूको नयाँ मोर्चा निर्माणका लागि नेपाल कम्युनिष्ट पार्टीका महासचिव नेत्रविक्रम चन्द विप्लवले गरेको प्रस्तावमाथि सकारात्मक प्रतिक्रिया जनाएका छन् । 

आज बिहान टोखास्थित रावलको निवासमा विप्लव र रावलको वार्ता भएको थियो । उक्त भेटवार्तामा राष्ट्रिय स्वाधीनताको लागि सबै देशभक्त एक हुन र  मोर्चा बनाउने कुरामा विप्लवले जोड दिएका थिए । 

जवाफमा आफूले देशभक्तहरू एक हुने कुरा उचित भएको र हाल आफ्नो ठाउँबाट भूमिका खेल्नु उचित हुने  विचार राखेको रावलले जानकारी दिएका छन् । 

‘आज  नेकपाका महासचिव नेत्र विक्रम चन्द ‘विप्लव’ र नेता खड्ग विश्वकर्मासँग मेरो घरमा भेटवार्ता भयो । उहाँहरूले राष्ट्रिय स्वाधीनताको लागि सबै देशभक्त एक हुन र  मोर्चा बनाउन जोड दिनुभयो । देशभक्तहरू एक हुने कुरा उचित भएको र हाल आफ्नो ठाउँबाट भूमिका खेल्नु उचित हुने मेरो विचार रह्यो,’ भेटवार्ताबारे जानकारी दिँदै रावलले ट्वीट गरेका छन् ।