नेकपा माओवादी केन्द्रका अध्यक्ष पुष्पकमल दाहालले सत्तारुढ नेपाली कांग्रेसलाई साईजमा राख्न फेरी एमाले कार्ड प्रयोग गरेका छन् । कांग्रेसले चुनावी तालमेलको विश्वासिलो आधार नदिए नेकपा एमालेतिर जाने चेतावनी दिएका छन् ।

कांग्रेसले मंगलबार सम्पन्न केन्द्रीय कार्यसमिति बैठकमा ‘बहुसंख्यक स्थानीय तहमा विजयी बन्ने बलियो आधार र परिस्थिति निर्माण भइसकेकाले सत्ता गठबन्धनका दलहरुसँग स्थानीय अवस्था र आवश्यकता अनुरुप गठबन्धन गर्ने’ भन्दै निर्णय गरेपछि अध्यक्ष दाहाल चिढिएका छन् ।

बिहीबार बसेको सत्ता गठबन्धनको बैठकमा दाहालले कांग्रेससँग चुनावी तालमेलको विश्वासिलो आधार र तालमेलमा ‘सम्मानजनक हैसियत’को विषयलाई उठाएका छन्। उनले ‘बहुसंख्यक स्थानीय तहमा विजयी बन्ने बलियो आधार र परिस्थिति निर्माण भइसकेको’ भन्ने वाक्य प्रति कटाक्ष गर्दै ‘तपाईंहरुले जित त सुनिश्चित गरिसक्नुभएकै छ, अब त्यसमा के छलफल गराई भयो र ?’ भनेको एक नेताले जानकारी दिए ।

कांग्रेसले गठवन्धनलाई हल्का ढंगले लिएको भन्दै दाहालले जितको विश्वासिलो आधारका लागि एमालेतिर जाने र त्यसो भयो भने कांग्रेस अप्ठ्यारोमा पर्ने चेतावनी दिएका छन् । दाहालले एमाले र माओवादी केन्द्रका दोस्रो तहका नेताहरुबीच सम्वाद भइरहेको र कांग्रेस गम्भीर नभए एमालेतिर जानसक्ने चेतावनी दिए।

‘म एकदमै प्रेसरमा छु । मेरा साथीहरु राति १२ बजेसम्म पनि नेकपा एमालेका नेताहरुसँग मिटिङ गरिरहनुभएको छ। स्थानीय सरकारको गठबन्धन सही ढंगले गएन भने मैले नचाहँदा नचाहँदै पनि एमालेसँग गठबन्धन गर्नुपर्ने हुनसक्छ’ – दाहालको भनाई उध्रित गर्दै एक नेताले भने।

नेताहरुका अनुसार दाहालले देशभर चुनावी तालमेलको निर्णय शीर्ष तहबाटै होस् भन्ने चाहेका थिए । २०७४ सालको निर्वाचनमा विजयी भएको स्थानलाई सोही दलका उम्मेदवारलाई छोडिदिने र बाँकी भागवण्डा गर्ने उनको को प्रस्ताव छ ।

कांग्रेस सभापति देउवा पनि केन्द्रबाटै तालमेलबारे निर्णय गर्ने पक्षमा छन् । तर डा. शेखर कोइराला समूहले एक्लै लड्नुपर्ने दबाव दिएको छ भने तल्लो तहबाट तालमेलबारे केन्द्रबाट निर्णय नगर्न चर्को खबरदारी छ । त्यसैले दाहालको चेतावनीमा प्रधानमन्त्री शेरबहादुर देउवाले भने कुनै प्रतिउत्तर नदिएकोे नेताहरुको भनाई छ। 

यता, एमाले र माओवादी केन्द्रका दोस्रो तहका नेताहरु केही दिनअघि चीन भ्रमण गरेर फर्किएका थिए । एमाले उपाध्यक्ष विष्णु पौडेलसहितको टोली गत साता कुन्मिङ गएको थियो भने माओवादी नेताहरु वर्षमान पुन र देव गुरुङ पनि कुन्मिङ पुगेका थिए । दुबै दलका नेताहरु एकैपटक चीन भ्रमणमा जानु संयोग मात्रै नभएकाले पार्टी एकताका लागि चीन सक्रिय भएको कतिपयको बुझाइ छ ।

पुष्पकमल दाहाल एमाले कार्ड