नेकपा एमालेले पोखरा महानगरपालिकाको मेयरका लागि दीपक पौडेललाई दिएको टिकट खोसेको छ। चोरीको आरोप लगाएर सामाजिक सञ्जालमा भिडियो भाईरल भएपछि पौडेलको टिकट खोसिएको हो ।

शनिवार पोखरामा उम्मेदवारको टुंगो लगाएको केही समयमै मेयरका उम्मेदवार पौडेल सुन चोरी केसमा फसेको भन्दै भिडियो पोस्ट हुन थाल्यो । सुन पसलमा बसेर गहना हेरिरहेका पौडेलले खुसुक्क खल्तीमा हालेको यो भिडियोमा देखिन्छ । उनले सिक्री चोरेको र थाहा पाएर माफ मागेको तथा पार्टीले मिलाएको चर्चा पोखरामा छ ।

भिडियोले मेयरका उम्मेदवार पौडेललाई मात्र होइन, पार्टीमाथि नै प्रहार गरेपछि एमालेलाई अप्ठ्यारो परेको थियो। त्यसपछि पूर्वमेयर तथा सांसद कृष्ण थापा मेयर उम्मेदवारमा छनौट भएका छन् । पौडेलको टिकट खोसेर थापालाई दिएको छ । एमाले उपमहासचिव पृथ्वीसुब्बा गुरुङ र केन्द्रीय सदस्य खगराज अधिकारीको टकरावका कारण कास्कीमा एमाले विभाजित छ ।

पौडेलले गुरुङ प्यानलबाट टिकट पाएका हुन् । त्यसपछि उनीविरुद्ध प्रहार धेरै भयो । अन्ततः उनको टिकट फिर्ता लिएर खगराज प्यानलका थापालाई टिकट दिइएको हो ।

उपमेयरमा भने पुनः मन्जु गुरुङ नै उम्मेदवार बनेकी छिन् । यसअघि गुरुङले आफू उम्मेदवार नबन्ने बताएपनि अहिले मौन छिन् । थापा र गुरुङ दुवैजना केन्द्रीय सदस्य हुन् । थापालाई रोक्न पृथ्वीसुब्बाले प्रदेश सरकार आफ्नो बन्ने र त्यहाँ मत नपुग्ने कार्ड फालेका थिए । तर उनको कार्ड सफल हुन सकेन ।

अन्ततः थापालाई टिकट दिइएको छ । थापा २०५४ सालमा पनि पोखराको मेयर भएर काम गरेका ब्यक्ति हुन् । २०७० मा भने कास्की २ बाट चुनावमा पराजित भएका थिए । 
 

पोखरा महानगरपालिका नेकपा एमाले