प्रमुख प्रतिपक्ष दल नेकपा उमालेका अध्यक्ष एवम् पूर्वप्रधानमन्त्री केपी शर्मा ओलीले कांग्रेसको घोषणापत्र पढ्दा मज्जा आउने वताएका छन् । घोषणापत्रमा कांग्रेसले विकासका कुरा नै नगरेको भन्दै ओलीले कांग्रेसको नेतृत्व र पार्टी नै निष्प्रभावी भएको बताए ।

मंगलबार मनमोहन अधिकारीको २३औं स्मृति दिवसका अवसरमा सम्बोधन गर्दै अध्यक्ष ओलीले भने –‘विकास त हुँदै जाने कुरा हो । यो त गर्दै जाने कुरा हो केही गर्नुपर्दैन भन्छ कांग्रेस, कांग्रेसको घोषणापत्र पढ्नुस् न मज्जा आउँछ।’

कांग्रेसको घोषणा पत्र कुनै राजनीतिक दस्ताबेज नभएर गालीगलौज मात्रै समेटेको उनले बताए। ‘त्यो कुनै राजनीतिक दस्ताबेज नै होइन, पागलहरूको प्रलाप हो । घोषणापत्रमा कुनै राजनीतिक विश्लेषण छैन, मुख छाड्ने र दर्जनौं ठाउँमा नाम किटेर धारे हात लाइएको छ’ उनले भने–‘कांग्रेसको घोषणापत्रमा राजनीतिक कुरा नै छैन ।’

लोकतन्त्रका लागि कांग्रेसको आफूलाई माया लाग्ने गरेको पनि उनले बताए । ‘कुन रसातलमा पुग्यो कांग्रेस ? कठैबरी ! माया लाग्छ कांग्रेसको, दया लाग्छ कांग्रेसको, कहाँ पुग्यो विचरा कांग्रेस ?’ उनले भने–‘लोकतन्त्रका लागि मात्रै मैले कांग्रेसप्रति दया देखाएको हो । नत्र भने हामीलाई त राम्रो छ, दया देखाइराख्नुपर्दैन, नेपाली कांग्रेसका सभापति मेरो पुरानो मित्र हुनुहुन्छ । उहाँले यस्तै घोषणापत्र निकाल्नुहुन्छ, यस्तै काम गर्नुहुन्छ, यस्तै कुरा गर्नुहुन्छ भने त हामीलाई सजिलै हुन्छ ।’

नेपाली कांग्रेसको नेतृत्व यस्तो भइरहे त आफुहरुलाई सजिलै हुने ओलीले वताए । ‘यस्तै सरकार हुने हो भने त हामीलाई सजिलो हुन्छ, गतिलो नेतृत्व हुने हो भने त हामीले अझ मिहेनत गर्नुपर्छ’– उनले थपे।

केपी शर्मा ओली कांग्रेसको घोषणापत्र