प्रशिक्षकको घरमा भोज खाएकी सागकी स्वर्ण विजेता सञ्जुको हत्या हो की आत्महत्या
प्रशिक्षकको घरमा भोज खाएकी १३ औं दक्षिण एसियाली खेलकुद (साग) मा भारोत्तोलनतर्फ स्वर्ण पदक विजेता २२ वर्षीया सञ्जु चौधरी मंगलबार मृत अवस्थामा भेटिएकी छन् ।
भारोत्तोलन प्रशिक्षक सञ्जय महर्जनको लुभुस्थित घरमा उनलाई मृत अवस्थामा भेटिएको हो । नेपाल भारोत्तोलन संघका अध्यक्ष रामकृष्ण श्रेष्ठ बोसका अनुसार सञ्जु बिहान झुन्डिएको अवस्माथामा मृत फेला परेकी हुन् ।
नेपालगञ्ज घर भएकी सञ्जु एसियाली खेलकुदको तयारीका लागि काठमाडौं आएकी थिइन् । उनले ६ महिनाअघि मात्रै नेपाल प्रहरीको जागीर छाडेकी थिईन। प्रशिक्षक सञ्जय महर्जनको घरमै बस्दै आएकी सञ्जुको शव सोही घरको भुइँतलाको कोठामा सलको पासो लगाएर झुण्डिएको अवस्थामा फेला परेको हो ।
सोमवार साँझ प्रशिक्षक महर्जनको घरमा भोजको आयोजना गरिएको थियो। भोजमा अध्यक्ष बोस पनि सहभागी भएका थिए । भोजमा सञ्जुले पनि सक्रियताका साथ खानेकुरा बाँडिरहेको र सबैसँग हासीखुसी व्यवहार गरिरहेको आफूले पाएको अध्यक्ष बोसले वताए ।
बिहान चाँडै उठेर प्रशिक्षणमा जाने सञ्जु अबेरसम्म नउठेपछि थोरै पर्दा खुलेको झ्यालबाट हेर्दा महर्जनले झुण्डिरहेको देखेका थिए । त्यसपछि उनले भारोत्तोलन संघका अध्यक्ष र प्रहरीलाई खबर गरेका हुन् । उनी मृत अवस्थामा भेटिनु अघि उनको फेसबुक एकाउन्टमा एउटा भिडियो सेयर गरिएको छ।
भिडियो पाकिस्तानी वेव सिरिज ‘मेरे हमसफर’को हो । सञ्जुले ‘मिसिङ यू लभ’ भनेर शेयर गरेको यो भिडियोका कारण प्रेम र पारिवारिक तनावका बीच सञ्जुले आत्महत्या गरेको होकी भन्ने आशंका पनि गरिएको छ।
उनले दुई वर्ष अगाडि नेपालमा भएको दक्षिण एसियाली खेलकुदमा ५९ केजी तौल समूहमा स्वर्ण जितेकी थिइन् । उनलाई नेपाली भारोत्तोलन क्षेत्रका महिला खेलाडीहरूमा सबैभन्दा उत्कृष्टमध्ये एक मानिन्छ ।
