वडा सदस्य जितेको खुसी थाम्न नसकेर सुतिहारको ज्यान गयो
सप्तरीमा एक जना नवनिर्वाचित वडा सदस्य शपथ ग्रहण गर्न नपाउँदै वितेका छन् । राजगढ गाउँपालिकाका वडा सदस्यको ६९ वर्षीय राजेन्द्र सुतिहारको शुक्रवार निधन भएको हो ।
राजगढ गाउँपालिका –५ धौनकी टोलका सुतिहारको अचानक निधन भएको परिवारका सदस्यले जानकारी दिएका छन् । वडा सदस्यमा निर्वाचित भएपछि उनी अत्यन्तै खुसी देखिएका थिए ।
जसपाको तर्फबाट उम्मेदवार बनेर निर्वाचनमा सहभागि भएका सतिहार बुधबार साँझ आएको मत परिणाम अनुसार वडा सदस्यमा निर्वाचित भएका थिए । निर्वाचित हुने दुई वडा सदस्यमा सर्वाधिक मत उनकै छ। उनले ४७४ मत ल्याएका थिए ।
एमालेका उम्मेदवारलाई पराजित गर्दै वडा नम्बर ५ मा प्यानलसहित जसपाको जितमा उनी र हरी मण्डल निर्वाचित भए । मतपरिणाम सार्वजनिक भएपछि उनी बिहीबार विजय जुलुसमा सहभागि भए। खाना खाएर सुतेको उनी बिहान घरमै मृत्यु अवस्थामा फेला परेको स्थानीयले वताए ।
उनको मृत्युको कारण नखुलेपनि अधिक खुसी भएका कारण यस्तो भएको हुन सक्ने स्थानीयको अनुमान छ।
मृतक सुतिहारका श्रीमती, २ छोरा र १ छोरी छन् ।
