डोटीमा शनिबार विहान यात्रु बस दुर्घटना हुदा १८ महिने बालक बेपत्ता भएका छन् भने १३ जना घाईते भएका छन् । 

कैलालीबाट अछामका लागि छुटेको ना ५ ख ९६६३ नम्बरको बस शनिबार बिहान ५ बजे शिखर नगरपालिका–१ गेरुपानीमा दुर्घटना भएको थियो। दुर्घटनामा अछाम चौरपाटी गाउँपालिका–६ का सुरेन्द्र शाहीका १८ महिने छोरा सुजन बेपत्ता छन् । दुर्घटनमा परेको बस बस सेती नदीको किनारमै पुगेका कारण बालक नदीमा बेपत्ता भएको हुन सक्ने प्रहरीको अनुमान छ ।

१३ जना घाइते मध्ये बसका सहचालकसहित ३ जना गम्भिर घाइते रहेको प्रहरीले जनाएको छ। उनीहरुलाई उपचारका लागि धनगढी पठाईएको छ। ८ जना सामान्य घाइतेको शैलेश्वरी अस्पतालमा उपचार भइरहेको जिल्ला प्रहरी कार्यालय डोटीका प्रवक्ता डिएसपी भोलाकुमार भट्टले जानकारी दिए ।

बस चालक फरार छन् । उनको खोजी भइरहेको र दुर्घटनाबारे थप अनुसन्धान भइरहेको भट्टले बताए ।