सभामुख अग्निप्रसाद सापकोटाले खरानीसमेत नेपालमा आयात हुन्छ भन्ने सुन्दा अचम्मित भएको बताएका छन् । सोमबार काठमाडौंमा आयोजित एक कार्यक्रममा खरानी समेत आयात हुने गरेको सुन्दा अचम्ममा परेको भन्दै चिन्ता ब्यक्त गरे।

पर्याप्त फलफूल, तरकारी, खाद्यान्न उत्पादन हुने नेपालजस्तो उर्वर भूमिमा २ खर्ब ५० करोडको खाद्यवस्तु आयात हुनु दुःखद् भएको पनि उनले वताए । ‘२ खर्ब ५० करोडको हामी खाद्यवस्तुहरू आयात गर्छौं । योभन्दा लज्जा र चिन्ताजनक स्थिति के हुन्छ ?’– उनले भने।

‘जनै लाउँछौँ तर नलगाउने चीनबाट पठाइदिन्छन्, राखी त्यस्तै। खरानीसमेत नेपालमा आयात हुन्छ । यो सुनेर आफैँ अचम्मित छु’– सापकोटाले भने। नेपालमा गुन्द्रुकसम्म आयात हुने गरेको उनले बताए ।

उनले अर्को प्रसंगमा बोल्दै युवाहरूको आवाजलाई अहिले सिंगो राष्ट्रले बुलन्द गरिरहेको बताएका थिए। उनले काठमाडौं र धरानबाट युवाको आवाज बुलन्द हुन थालेको बताए।

‘युवाहरुको आवाजलाई अहिले सिंगो राष्ट्रले धेरै राम्रोसँग बुलन्द गरिरहेको छ । अहिले त छिटपुट संकेतहरु मात्रै देखा परेका छन्, काठमाडौं, धरान लगायतका ठाउँहरुमा’ उनले भने–‘यो संकेत मात्रै हो, साइरन हो यो । साइरनको भाषा हामीले बुझ्नुपर्छ।’

सभामुख सापकोटाले विश्वभर अराजकता र एक प्रकारको अन्तरविरोध मडारिन थालेको भन्दै संसारको ध्यान व्यापार, हतियारको होडबाजी र सैन्य क्षेत्रमा नै केन्द्रित भइरहेको बताए ।