कंग्रेस सांसदले राष्ट्रपतिलाई ‘राष्ट्रपत्नी’ भनेपछि संसदमा हंगामा
नवनिर्वाचित राष्ट्रपति द्रौपदी मुर्मूलाई ‘राष्ट्रपत्नी’ भनेपछि भारतको संसदमा हंगामा भएको छ। सांसदले होहल्ला गरेपछि संसद बैठक नै स्थगित भएको छ ।
भारतको पश्चिम बंगालका कांग्रेस सांसद अधीर रञ्जन चौधरीले राष्ट्रपतिलाई ‘राष्ट्रपत्नि’ भनेपछि सत्तारुढ भारतीय जनता पार्टी विजेपीका सांसदहरुले विरोध गरेका छन् । विजेपीका सांसदहरुले संसदमा कांग्रेसले माफी माग्नु पर्ने बताएका छन् ।
संघीय मन्त्री स्मृति इरानीले कांग्रेसले मुर्मूप्रति घृणा र उपहास गर्ने गरेको आरोप लगाइन् । राष्ट्रपतिको उम्मेदवारका रुपमा दौपदी मुर्मूको नाम घोषित भएदेखि नै उनी कांग्रेसको घृणा र उपहासको शिकार भएको उनको भनाई छ।
कांग्रेसले मुर्मुलाई कठपुतली भनेको भन्दै उनले रोस प्रकट गरिन। एक जना आदिवासी महिला देशको सर्वोच्च संवैधानिक पदमा पुगेको कांग्रेसले स्वीकार्न नसकेको उनको आरोप छ ।
तर, चौधरीले भने जिब्रो चिप्लिएर राष्ट्रपत्नी शब्द उच्चारण भएको भन्दै सफाइ दिएका थिए । ‘दुई दिन अघि जब हामी विजय चोकतिर जाँदै थियौं, हामीले कहाँ जाँदै हुनुहुन्छ भनेर सोधियो, मैले राष्ट्रपति भवन जान चाहेको र राष्ट्रपतिलाई भेट्न चाहेको बताउन खोजेको थिएँ, तर गल्तीले मुखबाट राष्ट्रपत्नी शब्द निस्कियो ।’
सत्ताधारी दलले तीललाई पहाड बनाएको चौधरीको आरोप छ ।