नेपालमा कोरोनाबाट हुने मृत्यु दर वढेको छ। कोरोनाबाट २७ गतेदिनमा ३२ जनाले ज्यान गुमाएका छन् । साउन १ गतेदेखि २७ गतेसम्म ३२ जनाको कोरोना संक्रमणका कारण मृत्यु भएको स्वास्थ्य तथा जनसंख्या मन्त्रालयले जनाएको छ।

वैशाख २१ गते कोरोना संक्रमणबाट मृत्यु भएकोमा त्यसको ७३ दिनपछि साउन १ गते कोरोना संक्रमणबाट १ जना संक्रमितको मृत्यु भएको थियो। साउन २६ गते सबैभन्दा धेरै ५ जनाको मृत्यु भएको मन्त्रालयले जनाएको छ।

कोरोना संक्रमणबाट मृत्यु भएका अधिकांश व्यक्तिहरु र्दीर्घरोगी, ज्येष्ठ नागरिक र खोप नलगाएका व्यक्ति रहेको मन्त्रालयका प्रवक्ता डा. समीरकुमार अधिकारीले बताए ।

मृत्यु हुने मध्ये ६ जनाले मात्र खोप लगाएको पाइएको छ। मृत्यु हुनेमा एक जना २१ वर्षीय र अरु ५० वर्ष माथिका छन् । 

नेपालमा हालसम्म कुल जनसंख्याको २ करोड ९१ लाख ९२ हजार ४८० मध्ये ७५.१ प्रतिशतले एक मात्रा र ७०.७ प्रतिशतले पूर्ण मात्राको खोप लगाएका छन् । त्यसैगरी लक्षित जनसंख्या १२ वर्ष माथिका २ करोड ३३ लाख २७ हजार ६१९ मध्ये ९३.९ प्रतिशतले एक मात्रा र ८८.५ प्रतिशतले पूर्ण मात्राको खोप लगाएका छन् ।

बुस्टर मात्राको खोप भने ७४ लाख ११ हजार ८८९ जनाले लगाएका छन् ।