कुनै ठाउँमा मुडभेडको अवस्था तथा तितरवितर गर्नु पर्ने अवस्था भए सामान्यतया प्रहरीले माईकिङ्ग गरेर सचेत गराउने प्रचलन छ। हामीले देख्दै आएको र प्रचलनमा रहेको तरिका यही नै हो।

तर, काठमाण्डौं महानगरपालिकाको फोहोर ब्यवस्थापनका क्रममा यो बञ्चरेडाँडामा सर्वसाधारणले नै माइकिङ्ग गरेर प्रहरीलाई सचेत गराएका छन् । विहानैदेखि नै फोहोर बोकेको गाडी रोकेका स्थानीयले प्रहरी र सवारी चालकलाई जबरजस्ती नगर्न भनेका छन् ।

उनीहरुले महानगर स्थानीयको माग प्रति गैर–जिम्मेवार भएको भन्दै ‘५० हजार मान्छे मार्न खोजेको’ आरोप लगाएका छन् । स्थानीयले माइकिङ गरेर झुटो मुद्दा खारेज गर्न र दमन रोक्न प्रहरी समक्ष माग गरेका छन् । माग पुरा नभए स्थिति मुठभेडतर्फ जाने उनीहरुको चेतावनी छ।

नुवाकोटको ककनी गाउँपालिका र धादिङको धुनीवेशी नगरपालिकाको क्षेत्रमा सडकमा युवाहरु जम्मा भएका छन् भने डाँडा–डाँडामा महिला र वृद्धवृद्धाहरु गएर बसेका छन् ।

काठमाडौं महानगरपालिकाले सोमबार करिव ३ सय प्रहरी परिचालन गरेर २ सय ३ गाडी फोहोर विसर्जन गरेको थियो। काठमाडौं महानगरपालिकाका मेयर बालेन्द्र साहले सत्तारुढ दलकै नेताको अवरोधका कारण फोहोर ब्यवस्थापनमा अबरोध भएको आरोप लगाएका थिए ।