नेपाली कांग्रेसका महामन्त्री एवम् सांसद गगन थापाले चुनावपछि सत्तारुढ गठबन्धन कायमै रहने ग्यारेन्टी के छ भन्दै प्रश्न गरेका छन् । अहिले तालमेल गरेर सत्ता गठबन्धनमा रहेका दललाई मत मागे पनि त्यसपछि गठबन्धन कायम रहने ग्यारेन्टी नभएको उनको भनाई छ ।

शनिबार स्वयम्भुमा भएको प्रदेशसभा क्षेत्रीय सम्मेलनलाई सम्बोधन गर्दै उनले भने ‘हामी तालमेल गरेर चुनावमा भोट त मागौंला तर चुनाव भएको ६ महिनामा एउटा एकातिर अर्को अर्कोतिर हिँड्दैन भन्ने के ग्यारेन्टी छ ?’ ०७४ सालको निर्वाचनमा नेकपा एमाले र नेकपा माओवादी केन्द्रले वाम गठबन्धन गरेर पार्टी एकीकरण नै गरे पनि पछि अलग भएको उनले स्मरण गरे ।

उनले चुनावपछिको तालमेल उपयुक्त हुने बताए । ‘चुनावअघि तालमेल गर्न हुँदैन भन्ने कुरा ठीक हो । तर हामीले तालमेल गर्न हुँदैन भनेर के गर्ने अर्कोले गरिदिहाल्छन। निर्वाचनअघि तालमेल नगरेपछि हाम्रो स्थिति के हुन्छ ? २०७४ सालमा भोगेर आइसक्यौं ।’ उनले भने।

थापाले पाँच वर्षसम्म संघीयताको अभ्यास गर्दा प्रदेश सरकारहरूले पाउनुपर्ने हैसियत नपाएको बताए। उनले अहिले नै प्रदेश सरकार चाहिने र नचाहिने बहसमा पर्नुभन्दा अबका पाँच वर्षलाई प्रदेश सरकारको परीक्षाको रुपमा लिनुपर्ने बताए । महामन्त्री थापाले बितेका पाँच वर्षमा तीन तहकै सरकारले आ–आफ्नो कार्यक्षेत्र र भूमिकाबारे जनतालाई बुझाउन नसक्ने बताए ।

‘प्रदेशले जुन हैसियत पाउनुपर्ने हो, त्यो पाउन सकेको छैन । हामीले संघीय व्यवस्था बनाउँदै गर्दा जुन स्पष्ट दृष्टिकोण राखेका थियौँ, त्योअनुसार प्रदेश सरकार चल्न सकेनन्,’ उनले भने, ‘बरू स्थानीय सरकारको सन्दर्भमा हामीले सफलता पाएका छौँ । तर प्रदेश सरकारको हकमा हामी सफल हुन सकेनौँ । यो तितो यथार्थ हामीले बोल्नैपर्छ । हामीले जे सोचेर प्रदेश सरकार बनाएका थियौँ, त्योअनुसार काम हुन नसकेको सत्य हो । यसमा प्रदेश सरकारमात्रै होइन, संघीय सरकार पनि दोषी छ ।’

महामन्त्री थापाले पाँच वर्षसम्म प्रदेश सरकारहरुले ठीक ढंगले काम गर्न नसक्दा प्रदेश सरकार किन चाहियो भनेर प्रश्न उठ्न थालेको बताए ।

‘जसरी स्थानीय तहले स्थानीय क्षेत्रको आवश्यकता र स्रोत साधनको पहिचान गरी परिचालन गर्छ, प्रदेशले ठीक त्यसैगरी प्रदेश क्षेत्रको काम गर्नुपर्ने हो । तर, हामी कहाँ त्यसको राम्रो अभ्यास हुन सकेन,’ उनले भने, ‘संघीय सरकारले पनि प्रदेशलाई त्यो हैसियत दिन चाहेको देखिएन । प्रदेशले जसरी भूमिका निभाउनुपर्थ्यो, त्यो पनि सकेन । खासमा हामीले प्रदेश सरकार किन बनायौँ भनेर जनतालाई बुझाउनै सकेनौँ ।’