काठमाडौंको फोहोर बोकेर बन्चरे डाँडा ल्यान्डफिल क्षेत्रमा गएका गाडी सोमबार राती अज्ञात समूहले तोडफोड गरेको छ । सिस्डोल–बञ्चरेडाँडा सडकखण्डको आलेटार भन्ने ठाउँमा टिपर र डोजर तोडफोड भएको हो।

पार्किङ गरेर राखिएका १४ वटा टिपर र ३ वटा डोजर तोडफोड भएको काठमाडौं महानगरपालिकाले जनाएको छ । प्रहरीका अनुसार राति करिव ८ बजेर ५० मिनेटमा गाडि तोडफोड भएका हुन।

तोडफोड भएका सवारी साधानहरु फोहोर मैला व्यवस्थापन गर्ने कम्पनी र निजी क्षेत्रका हुन् । काठमाडौं महानगरपालिका डिएसपी पूर्णचन्द्र भट्टले १४ वटा फोहोरका गाडी र सडक मर्मतमा प्रयोग भएका तीनवटा डोजर तोडफोड भएको बताए ।

सोमबार दिउँसो काठमाडौं महानगरपालिकाले बल प्रयोग गरेर बन्चरे डाँडामा ४० टिपर फोहोर विसर्जन गररेको थियो। राति अबेर भएपछि फोहोर बोकेका टिपर सशस्त्र प्रहरीको बेस क्याम्प नजिकै पार्किङ गरिएका थिए ।

फोहोर बोकेका गाडी तोडफोड भएपछि काठमाडौंको फोहोर व्यवस्थापनमा पुनः समस्या देखिएको छ । स्थानीयका माग सम्बोधन गर्ने सहमतिसहित पछिल्लो समय यहाँको फोहोरलाई बञ्चरेडाँडा लिएर व्यवस्थापन थालिएको थियो । तर, पछिल्लो समय पुनः स्थानीयवासीले आफ्ना मागबारे बेवास्था गरेको भन्दै आपत्ति जनाउँदै आएका छन् ।

नुवाकोट र धादिङका स्थानीयले फोहोर बोकेको गाडीबाट धेरै धुलो उड्यो भन्दै गाडी आवातजावतमा रोक लगाउन खोजेका थिए । तर, प्रहरी झिकाएर फोहोर विसर्जन गराइएको थियो । त्यति वेला स्थानीवासीले कुनै प्रतिक्रिया जनाएनन्। तर राती कसले फुटायो भन्नै पत्तै नपाएको प्रहरीको भनाई छ।

यसैबीच, टिपर चालकहरूले सिसडोलमा मंगलबार बिहान नाराबाजी गरेका छन् । सशस्त्र प्रहरी पोस्ट नजिकै पार्किङ गरेर राखिएको गाडीलाई समेत सुरक्षा दिन नसकेको भन्दै उनीहरुले विरोध जनाए ।