नेकपा माओवादीका राष्ट्रियसभा सदस्य सुरेश आले मगरले ‘राजा’सँग पनि गठबन्धन गर्नुपर्ने बताएपछि त्यसको ब्यापक चर्चा भएको छ। राजा र राजसंस्था नै नभएको मुलुकमा राजासंग गठवन्धन गर्ने भनेपछि उनी विवादमा पनि परेका छन् ।

राष्ट्रियसभाको शुक्रबार बसेको बैठकमा आलेले निश्चित मुद्दाका कारण कांग्रेससँग गठबन्धन गर्नु परेको र नेपालमाथि कुनै विदेशी शक्तिले आक्रमण ग¥यो भने राजासँग पनि गठबन्धन गर्नुपर्ने बताएका थिए।

नेकपा एमालेका सांसदहरुले नेपालमा दुई पार्टी मात्र हुने भन्दै दिएको अभिव्यक्तिको खण्डन गर्दै उनले माओवादीले कांग्रेससँग गठबन्धन गरेकोमा प्रश्न उठाउनुभन्दा किन ग¥यो होला भनेर खोज्न सुझाव दिए । उनले भने, ‘कम्युनिस्ट त छोडिदिनुस्, राजतन्त्रसँग पनि गठबन्धन गर्नुपर्ने हुनसक्छ ।’

राष्ट्रियसभा सदस्य खिमलाल भट्टराईले भने आलेको अभिब्यक्ति रेकर्डबाड हटाउन माग गरे। आलेको अभिव्यक्ति गम्भीर भएको बताएका उनले नेपालमा अहिले राजतन्त्र र राजा दुबै नभएको भन्दै उनको भनाईको खण्डन गरे।