सरकारले जापान सरकारको अनुदान तथा सहुलियत ऋणमा चन्द्र नहर सिंचाइ प्रणालीको मर्मत सम्भार एवम् सुधार गर्ने भएको छ। पूर्वी तराई क्षेत्रमा भरपर्दो र निरन्तर सिंचाइ सुविधाका लागि चन्द्र नहरको मर्मत संभार गरिने अर्थ मन्त्रालयले जानकारी दिएको छ ।

जापानले नेपाललाई १६ अर्ब भन्दा बढी ऋण तथा अनुदान सहायता दिने सम्झौता भएपछि मन्त्रालयले यस्तो जानकारी गराएको हो। बुधबार अर्थ मन्त्रालयमा आयोजित कार्यक्रममा सहायता उपलब्ध गराउनेबारे सम्झौता भएको हो ।

जापानले जापानी येन २२५.६० करोड (करिब रु. २ अर्ब) अनुदान सहायता र शहरी प्रसारण तथा वितरण प्रणाली सुधार आयोजना कार्यान्वयनका लागि जापानी येन १५९.०१ करोड (करिब रु १४.२ अर्ब) बराबरको सहुलियतपूर्ण ऋण सहायता उपयोग गर्ने सम्बन्धी छुट्टाछुट्टै सम्झौता पत्रमा हस्ताक्षर भएको छ ।

वार्षिक ०.०१ प्रतिशत व्याजदर, ३० वर्षको भुक्तानी अवधि र १० वर्षको ग्रेस अवधि रहेको सहुलियतपूर्ण ऋण काठमाडौं र पोखरा लगायतका सहरमा प्रसारण चुहावट घटाउन र वितरण प्रणालीको विश्वसनीयता बढाउनका लागि प्रयोग गरिने मन्त्रालयले जनाएको छ ।

सम्झौता पत्रमा अर्थ मन्त्रालय, अन्तर्राष्ट्रिय आर्थिक सहयोग तथा समन्वय महाशाखाका सहसचिव ईश्वरीप्रसाद अर्याल र जाइका नेपालका प्रमुख प्रतिनिधि ओकुबो अकिमित्सुले हस्ताक्षर गरेका छन् । नेपाल सरकारका तर्फबाट अर्थसचिव कृष्णहरि पुस्कर र जापान सरकारका तर्फबाट नेपालका लागि जापानका राजदूत किकुता युताकाले सम्झौता पत्र आदान प्रदान गरे। 

चन्द्र नहर