सरकारले समयमा ध्यान दिन नसक्दा देशभर डेंगुको संक्रमण र मृत्यु हुनेको संख्या निरन्तर वृद्धि भईरहेको छ। स्वास्थ्य तथा जनसंख्या मन्त्रालयका अनुसार ७६ जिल्लामा डेंगु फैलिएको छ भने हालसम्म २२ हजार ९८८ जनालाई डेंगु भएको छ ।

यसैगरी डेंगु संक्रमणबाट मर्नेको संख्या २९ पुगेको छ । सबभन्दा धेरै बागमती प्रदेशमा १७ हजार ७३१ जनालाई डेंगु भएको छ । लुम्बिनी प्रदेशका २ हजार ८२१ जना, सुदूरपश्चिम प्रदेशका ७७७, प्रदेश १ का ५९१, गण्डकीका ५१५, मधेश प्रदेशका ३२३ र कर्णाली प्रदेशका २३० जनालाई डेंगु भएको छ ।

नियन्त्रणमा ढिलाइ भइसकेका कारण संक्रमित र मृत्युको संख्या अझै बढ्नसक्ने भन्दै स्वास्थ्य विज्ञहरूले चेतावनी दिएका छन् । नेपालमा २–३ वर्षको अन्तरालमा डेंगीले प्रकोपको रुप लिने गरेको छ । 

नेपालमा पहिलो पटक २०६१ मा डेंगुका बिरामी भेटिएका थिए । त्यसयता हरेक वर्ष बढ्दो क्रममा रहेको डेंगुले यो वर्ष महामारीकै रुप लिएको छ । यस वर्ष डेंगी संक्रिमतको केसले ३ वर्षअघिको रेकर्ड तोडिसकेको छ । 

१० जिल्लामा मात्रै १९ हजार ७ सय २७ जनामा संक्रमण पुष्टि भएको छ । डेंगीको उच्च जोखिममा रहेका १० जिल्लामध्ये ५ जिल्लामा डेंगीका हजारभन्दा बढी केसहरू पुष्टि भइसकेका छन् । काठमाडौंमा ७ हजार ३८०, ललितपुरमा ५ हजार ५८५, मकवानपुरमा २ हजार १३५, दाङमा २ हजार २७८ र भक्तपुरमा १ हजार ५० केसहरू पुष्टि भएका हुन्।

ईडीसीडीले डेंगुलाई राष्ट्रव्यापी प्रकोप घोषणा गर्न स्वास्थ्य मन्त्रालयसँग पत्राचार गरिसकेको छ । डेंगु संक्रमितको संख्या बढेसँगै अस्पतालमा बिरामीको संख्या पनि अधिक छ। शुक्रराज ट्रपिकल तथा सरुवा रोग अस्पतालका संक्रामक रोग विशेषज्ञ डा शेरबहादुर पुन ‘मास’ मा नै डेंगी फैलिसकेको बताउँछन् ।